Tour de Timor ba dala lima hahu ho kontroversia iha Segunda-Feira (2/09) ho grupu ida ho siklistas nain 30 resin protesta iha linha partida kona ba falta suporta hosi governu ba siklistas Timoroan.
Grupu ne’e rejistra atu partisipa iha Tour de Timor maibe to’o ikus la bele tuir tanba organizadores eventu ne’e la suporta sira atu hadia sira nia bisikleta.
Siklistas nain 60 mak sei kontinua tour loron lima ne’e, hosi ema siklistas nain 176 ne’ebe rejistra atu partisipa iha Tour de Timor maibe to’o ikus la tuir.
Siklista ida ne’ebe hatoo mos nia protesta, Carlos da Cruz e Silva, hatete iha tinan seluk siklistas Timoroan hetan bisikleta foun ka suporta atu hadia sira nia bisikleta molok Tour hahu.
“Maibe iha 2013 ami la hetan suporta ida. Ami la hetan buat ida,” nia hateten.
Nia haktuir tan katak grupu ne’e hatoo relatorio ba Federasaun Siklismu kona ba problema ho sira nia bisikleta maibe to’o ikus la hetan suporta.
“Tinan oin karik sira hadia buat balun kona ba Tour de Timor, ami sei tuir fali. Ami hakarak tuir. Ami mos hakarak dame no estabilidade iha ita nia nasaun,” hateten nia.
Tour de Timor ba dala lima organiza ba dala uluk hosi Ministro Turismo hafoin hetan handover hosi gabinete Prezidente da Republica.
Hafoin handover orsamento ba Tour de Timor mos hamenus hosi governu hosi $300,000 ba $150,000 no mos suporta hosi sponsor sira mos menus.
Eventu Tour de Timor hahu ba dala uluk iha tinan 2009 liu hosi inisiativa ida hosi eis-Prezidente Jose Ramos-Horta atu promove dame no hatudu potensial turismo Timor-Leste nian.
Siklista hosi Malasia Shahrin Bin Amir manan primeira etapa Tour de Timor ho tempu oras 4 no 26 minutus, no Francelina ‘Anche’ Cabral mak siklista-feto lalais liu ho tempu oras 5 no 37 minutus.
Tour de Timor kordenador jeral Aquilino S. Caeiro hatete katak los duni grupu siklistas ba iha neba no la koi partisipa iha eventu ne’e.
“Ida ne’e sira nia direitu atu tuir ka la’e, ami la obriga ema ida,” nia hateten.
Nia hatete mos katak tinan oin eventu ne’e sei lao diak liu tan tanba tinan ne’e Ministerio foin mak organiza rasik ba dala uluk.
“Ami sei servisu hamutuk diak liu tan atu halo Tour de Timor sussessu bo’ot liu tan, atu Timoroan mos bele hatudu ba malu katak bele mos organiza eventu bo’ot ida hanesan ne’e.”
Tinan ida ne’e durante loron lima Tour de Timor sei liu hosi Baucau, Ossu, Manufahi, Aileu, Ermera no Liquica molok fila fali ba Dili.
Ministro Turismo Francisco Kalbuadi Lay hatete katak tinan oin ekipa organizadora sei koko atu hetan tan orsamentu liu hosi sponsor tamba governu iha prioridade seluk.
“Hau hatene katak ida prioridades seluk ne’ebe ami presiza atu tau matan. Ami agora fo atensaun liu ba edukasaun no saude. Ida ne’e aktividade desportu ida hosi aktividade desportu seluk ami tenki organiza,” hatete Ministry Lay semana kotuk.
