Prezidente Komisaun Nasional Direitu Labarik ,Komisaria Adalgiza Ximenes hateten, estabelesementu Komisaun Nasional Kontra Trabalhu Infantil (KNTI) ne’e importante tebes, nune’e bele fo protesaun ba labarik sira husi servisu ne’ebe todan.
Tanba ne’e Komisaria Komisaun Nasional Direitu Labarik (KNDL) ne’e husu ba Sekretariu EStadu Politika Formasaun Profesional no Empregu (SEPFOPE), atu aselera prosesu estabelesementu Komisaun Nasional Kontra Trabalhu Infantil (KNTI) ne’e.
“Ita hein katak ,iha tempu badak, bele estabelese ona komisaun ne’e para ita hare asuntu ida espesifiku liu ba labarik sira ne’ebe ita konsidera sira nudar trabalhu infantil,” Komisaria Ximenes hateten,hafoin partisipa selebrasaun loron mundial trabalho infantile,(12/06), iha Lecidere, Dili.
Tuir nia, servisu ne’ebe fo perigu ba sira nia saude, seguransa no edukasaun mak hanesan fase kareta, agrikultura, fa’an sasan, konstrusaun no seluk tan.
Entretantu Diretor Nasional Inspesaun Geral do Trabalhu, Aniceto Leto Soro katak, KNTI sei estabelese iha tinan ida ne’e, nune’e bele proteze labarik minoridade sira husi servisu todan ne’ebe bele prejudika sira nia saude no seguransa.
Soro afirma, problema trabalho infantil iha rai laran, problema ne’ebe kompleksu tebes, presiza atensaun espesifiku husi governu,komunidades, liu –liu inan aman sira no empregador sira atu labele haruka labarik ba hala’o servisu todan.
“Tinan ne’e bele estabelese ona, tanba ami prepara ona estatutu ba estabelesementu, ne’ebe ami aprezenta ona ba iha Konselhu Ministru atu hetan aprovasaun no legalidade iha tempu badak,” Diretor Soro afirma.
Nia dehan, prezensa komisaun ne’e importante, tanba iha reprezentante ministerio hotu inklui mos empregador sira no konfederasaun sindikatu trabalho sira nia membru mak tur iha esturuktura hodi garantia implementasaun lista servisu ne’ebe bandu ba labarik sira no planu nasional kontra trabalho infantil ne’ebe prepara ona.
Iha lidun seluk, Honorio Almeida nudar sosiedade sivil konkorda ho estabelesementu komisaun ida ne’e maibe tenke kria mos kondisoens tantu rekursu humanu no finanseiru atu bele implementa planu no aktividade sosializasaun ba komunidade hodi kombate trabalho infantil iha rai laran tanba Timor-Leste ratifika ona konvensaun internasional direitu labarik.
“Hau hanoin katak ida ne’e hanoin ne’ebe positive tebes husi parte governu atu garantia direitu labarik maibe labele mate ho estabelesementu ne’e presiza asaun atu kombate,” dehan Almeida.
