Diretor Jeral Ministerio Edukasaun (DJ-ME), Antoninho Pires, hateten tinan kotuk 2015) sira konsege rehabilita eskolas hamutuk 300 resin iha teritorio tomak.
Eskolas 300 resin ne’e, nia hateten, iha balun mak rehabilita maibe barak mos loke tan salas no konstrusaun foun ba sala balun tan.
“Ami kontinua nafatin halo rehabilitasaun ba eskola sira ne’ebe identifikadu presiza hadia, aumenta sala e ami sei tau osan nafatin,” DJ Pires hateten, iha servisu fatin, Vila Verde, Dili.
Nia hatutan, iha 2013 sira identifika eskolas hamutuk 800 mak ho kondisaun aat no presiza halo rehabilitasaun. Husi numeru ida ne’e durante (2014-2015) sira konsege rehabilita ona eskola hamutuk 500 resin no tinan ida ne’esei kontinua tan.
Nia dehan, dezenu ba projetu rehabilitasaun eskolas ne’e pakote, kada eskola kompletu ho saneamentu (sintina, bee moos), tanba projetu ida ne’e responsabiliza husi ekipa tekniku Agensia Dezenvolvimentu Nasional (ADN).
Iha parte seluk, Memberu Parlamentu Deputadu Manuel Castro, husu ba ADN atu klarifika orsamentu ne’ebe parlamentu aprova ba projetu rehabilitasaun eskolas, tanba eskolas barak mak sei aat no estudantes sei tuur iha rai.
Nia dehan, tinan 2014 Parlamentu Nasional aprova osan $25 miloens hodi rezolve problema infra-estrukturas eskolas, maibe realidade eskola barak mak sei aat, estudantes kontinua tuur iha rai.
“Hau akompanha projetu ne’e, iha eskola balun ba hada deit, la reboka e husik hela deit,” Deputado Castro hateten.
Nia konsidera, problema edukasaun seiduak bele rezolve tanba governu gasta osan arbiru deit, eskola kontinua laiha kondisaun.
