Koordenadora Fatin Hakmatek organizasaun Psychososial Recovery and Development East Timor (PRADET), Luisa Marçal, hateten kazu violensia domestika husi loron ba loron sa’e maka’as, tanba kauza husi hahalok poligamia no adolteiro ne’ebe buras iha rai laran.
Bazeia ba kazus ne’ebe PRADET atende loron-loron, nia dehan, hatudu katak violensia akontese iha familia laran la’os tanba ekonomia, maibe tanba problema kama rua.
“Kazu ne’ebe ami simu maioria tanba adolteiru no poligamia, la’en hola feto seluk, e la’os problema ekonomia,” Koordenadora Marçal hateten, iha Dili.
Nia informa, kada loron sira simu vitima nain hat ba leten, sira buka fatin seguru tanba sira nia uma la seguru ba sira atu hela.
Atu kombate problema hirak ne’e, nia dehan, presiza iha lei ida ne’ebe forte hodi kondena hahalok sira ne’e no nafatin fo edukasaun moral ba sosiedade sira.
Tuir relatorio da-ruak no da-toluk governu Timor –Leste ba komite Konvensaun Halakon Forma Diskriminasaun Hotu Kontra Feto (CEDAW) ne’ebe elabora iha tinan 2013 hatudu katak 2% feto kaben nain sira agora dadaun moris iha relasaun poligamia.
Iha parte seluk, Membru Grupo Feto Parlamentar, Deputada Josefa Alvares Pereira Soares, rekonese katak kazu violensia domestika kontinua aas, tanba mane barak mak agora hakarak hola feto rua no tolu.
Nia dehan, feto barak mak sofre husi violensias maibe sira tauk no moe halo keixa, sira prefere liu moris terus ho oan sira.
“Estado no tradisaun rekonese deit kazamentu monogam (feto ida ho mane ida) kazamentu seluk ne’e ita nia lei la premite,” nia hateten.
Nia hatutan, iha lei atu ejiji responsabilidade ema sira ne’e nian tanba ne’e husu feto sira atu labele tauk no moe halo keixa hodi prosesa tuir dalan formal.
