Vise Ministra Saude, Natalia de Araujo, hateten durante ne’e Ministerio Saude seidauk bele lori atendimentu saude to’o iha area remotas, tanba kondisaun infrastruktura liu –liu postu saude no uma ba medikus seidauk iha.
Durante ne’e, nia dehan, foin sukus 200 resin mak asesu ona ba atendementu saude, enkuantu seluk seidauk tanba laiha postu saude.
“Rekursu humanu sufsiente ona atu ita aloka ba iha sukus hotu, maibe problema mak suku balun seidauk iha postu saude no laiha fatin ba medikus sira inklui mos fasilidads,” Vise Ministra Araujo hateten, iha Dili.
Nia rekonese, inan barak mak sei partus iha uma tanba distansia fasilidade saude dook husi hela fatin,” nia dehan.
“Maibe ministerio esforsu nafatin kada tinan hasa’e area kobertura atendimentu saude ba populasaun,”.
Tuir dadus Demography Health Survey 2010 hatudu katak 78% inan feto partus iha uma, 19% partus apoiu husi daya (bidan tradisional), 61% ajuda husi membru familia no 15% partus mesak la hetan ajuda.
Membru Parlamentu Nasional, Deputada Bendita Moniz Magno, lamentavel ho situasaun hirak ne’e, tanba feto iha area rural seidauk asesu ba atendimentu saude.
“Inan feto sira partus, parteira sira tenke sunu lilin atu ajuda fo partus laiha lilin, sira uja lampra telephone nian nune’e mos aimoruk atu bele supporta inan feto sira partus, ran fakar laiha,” nia dehan.
Nia mos lamenta kondisaun estrada iha area remotas liu –liu suku Fatubolu, distritu Covalima ne’ebe kauza ba inan feto sira mate liu-liu tenke partus iha dalan no balun mate iha dalan tanba tarde to’o iha fasilidade saude.
Iha parte seluk, reprezentante UNFPA, doutora Domingas Bernando rekonese situasaun ida ne’e, inan sira tantu iha rural no Dili rasik barak mak lakohi ba fasilidade saude bainhira isin rua no partus tanba fasilidade saude dook husi hela fatin.
Nia dehan, inan feto barak mos laiha konesementu ne’ebe klean kona ba risku durante isin rua no partus, tanba sira okupadu ba atividade seluk no la vizita fasilidade saude.
“Mortalidade inan ho oan as tanba inan sira laiha konesementu ne’ebe diak ba sinais risku sira durante isin rua no partus,” dehan Nia.
Nia mos lamenta iha inan barak mak hafoin partus sira gosta tur ahi ou tau ahi iha hadak okos ne’e perigu tebes ba sira nia saude liu –liu bebe bele sofre moras infeksaun pulmaun.
