Virus HIV/SIDA iha distritu Bobonaro konsege hamate ona ema nain hitu husi afetadu nain 40, enkuantu nain 33 hetan ona tratamentu Anti Retro Viral (ARV) iha sentru saude sira.
Diretor Servisu Saude sub-distrito Maliana, Vitor Soares Martins, hateten distritu ne’ebe numeru HIV/SIDA as mak, primeiru distritu Dili, Bobonaro, no terseiru mak Baucau.
“Hau rekonese distritu Bobonaro numeru HIV/SIDA as, tanba besik fronteira Indonezia, entaun ema barak liu-liu ema adultu sira,” Diretor Martins hateten, iha Dili.
Nia hateten, dadaun ne’e estabelese mos fatin Voluntary Counseling no Testing (VCT) iha sub-distritu Balibo no Maliana hodi fo atendementu ba pasiente sira iha distritu Bobonaro.
“Sira hemu aimoruk Anti Retro Viral, hanesan meius ida atu redus kresimentu virus HIV/SIDA iha sira nia isin lolon,” nia dehan.
Iha parte seluk Sekretariu Jeral Komissaun Nasional Kombate HIV/SIDA, Daniel Marcal, hateten virus HIV/SIDA iha distritu Bobonaro sa’e, tanba loron kalan ema halo relasaun seksual ho livre, liu-liu iha sub-distrito Maliana.
“Tanba sub-distritu ne’e besik fronteira entre Indonezia ho Timor-Leste, ne’ebe virus ne’e ema lori husi nasaun vizinu sira mak lori mai, hanesan Oe-Cusse, no Suai tanba sira besik hotu iha area fronteira,” nia dehan.
Iha sorin seluk Xefe Unidade HIV/SIDA Ministeriu Saude, Marta Albenia dos Santos, hateten husi numeru afetadu 426, nain 41 mak mate ona, enkuantu nain 140 halo oina tratamentu ARV no restu la hatene nia paradeiru.
Husi numeru ne’ebe iha, nia dehan, inklui mos labarik minoridade (tinan 5 mai kraik) no idade tinan 12 ba leten to’o 56.
Nia nia dehan, distritu dadaun ne’e distritu hat ne’e mak sai alvu ba moras ne’e, maibe la taka dalan mos ba distritu seluk ne’ebe seidauk, tanba virus ne’e la’o hela iha komunidade nia le’et.
Numero virus ne’e, nia hateten, identifika liu husi teste ran ne’ebe mak MS estabelese fatin VCT iha sentru saude ho ospital referral lima, iha Timor laran tomak.
