Sekretariadu Estado Politika Formasaun Profesional e Empregu (SEPFOPE) hahu rehabilita fatin turismu komunitaria iha distritu hat, durante tinan lima nia laran.
Sekretariu Estado, Ilidio Ximenes da Costa, hateten turismu hanesan setor ida ne’ebe bele fo reseita maka’as ba estado, tanba bele atrai turistas inklui investidor sira mai investe barak liu tan.
“Ami sei rehabilita fatin turismu hat , no agora dadaun ami rehabilita ona ida iha Seloi kraik no restu seidauk,” SE Ximenes hateten, iha Parlamentu Nasional.
Nia dehan, fatin turismu komunitaria hirak ne’e mak hanesan Com iha distritu Lautem, Seloi Kraik iha distritu Aileu, Mota Bandeira iha Suai inklui mos Bee Manas Marobo iha distritu Bobonaro.
Kona ba orsamentu ba rehabilitasaun fatin turismu hirak ne’e, nia dehan, ho montante $90 mil rein inklui harii uma, jardin kompleta ho fasilidade, nune’e bele atrai turista sira bele vizita.
Nia hateten, durante ne’e reseitas estadu mai deit husi setor mina rai, telekomunikasaun, ospitalidade sira, maibe setor turismu seidauk fo reseita ba iha estado.
Iha parte seluk, Prezidente Komisaun D (ekonomia e dezenvolvementu), Deputada Jacinta Abucau Pereira, hateten SEPFOPE iha kompetensia atu halo rehabilitasaun ba iha fatin turismu no estrada rural.
“Hau hanoin importansia, tanba iha dekretu lei fo kompetensia ba SEPFOPE atu dezenvolve turismu komunitaria,” Deputada Pereira hateten.
Nia hatutan, iha dekretu lei ne’ebe koalia klaru kona ba separasaun kompetensia entre SEPFOPE ho Ministerio Turismu ba area Turismu sira ne’ebe iha, tanba ne’e SEPFOPE la hadau servisu Ministerio Turismu nian.
