“Agora oinsa ita bo’ot sira nia hanoin ba orsamentu ida ne’e,ita bo’ot sira hadia fali fatin lixu sira ne’e liu-liu lixu iha estrada protokolu sira ne’e ita hare katak,ninia imajen ladun diak wainhira ita nia tamu liu husi ne’eba lixu sira ne’e soe tun sae,” sujere Deputada Brigida Correia, iha Parlamentu, (18/02).
Deputada Correia hateten, oras ne’e dadauk lixu iha kapital Dili soe arbiru deit tanba fatin lixu la diak ona.
Hatan ba preokupasaun ne’e,Ministru Administrasaun Estatal (MAE), Jorge da Conceicao Teme katak, tinan ida ne’e ministeriu iha programa naran Programa Nasional do Dezenvolvimentu Sukus (PNDS) ne’ebe Dili mos tama ba programa ne’e sei hare ba fatin lixu ne’ebe mak hetan estragus ona.
“Hau hanoin program PNDS ne’e ami bele konsidera atu hare fatin lixeira ne’ebe mak halo tiha ona maibe at tanba ita nia komunidade dala ruma soe foer fatuk mos tama hotu iha laran,” katak Ministru Teme.
Nia dehan, sira identifika ona fatin lixu ne’ebe mak hetan estragus hanesan fatin lixu iha Becora, Comoro no Bairo-Pite e tinan ne’e sei hadia.
