Polísia Nasionál Timor-Leste (PNTL) liuhusi Unidade Patrulhamentu Fronteira (UPF) no Tentara Nasionál Indonezía (TNI) liuhusi Santuan Tugas Penyaman Perbatasan, hametin operasaun konjunta hodi fó seguransa ba komunidade sira iha fronteira entre nasaun rua Timor-Leste no Indonésia.
Komandante UPF Superintendente Euclides Belo dehan, operasaun konjunta ne’e liga ho objetivu prinsipál tolu (3) atu observa kondisaun pilár sira, hametin liña koordenasaun entre forsa rua, garante seguransa ba komunidade iha área froteriza.
“Atu atinje objetivu prinsipál tolu (3) ne’e mak UPF servisu hamutuk ho TNI hodi realiza operasaun konjunta iha fronteira terestre entre Timor-Leste no Indonézia,” nia informa.
Nia hatete, iha fronteira mós sira taka ona kuadru avizu atu komunidade sira bele hatene no respeita regra no soberania husi rai rua-ne’e nian.
“Ita-nia operasaun konjunta ne’e sei kontinua realiza, ita prontu 24 oras hodi asegura komunidade iha fronteira,” Komandante UPF Superintendente Belo salienta.
Nia hatete, dadaun ne’e fronteira hahú husi Covalima, Bobonaro, to’o Oecusse hamutuk walu-nolu-resin-hitu (87), UPF destaka hotu ona postu no koloka membru kada postu na’in tolu (3) hodi asegura.
Alende ne’e nia dehan, dadaun ne’e totál pesoál iha UPF hamutuk atus-tolu-haat-nolu-resin-lima (345), sira-ne’e koloka iha postu sira no areoportu nune’e mós servisu administrasaun nian.
Iha parte seluk Diretór Ezekutivu Fundasaun Mahein (FM) Nelson Belo dehan, seguransa iha fronteira atu aseguradu ne’e presiza kooperasaun entre forsa rai rua atu nune’e bele servisu apoiu malu.
“Forsa rai rua tenke kria ligasaun di’ak, servisu apoiu malu iha idak-idak nia área hodi bele fó seguransa ne’ebé nesesáriu ba komunidade iha fronteira,” nia hatete.
Nia hatete, operasaun konjunta ne’ebé mak UPF ho TNI realiza ne’e hatudu pasu importante ida ba relasaun di’ak entre forsa rua hodi proteje komunidade iha fronteira.
“La’ós asegura de’it komunidade sira, maibé halo prevensaun ba atividade kontra bandu no krime transnasionál sira,” Diretór FM Belo dehan.Alende ne’e nia dehan, tenke apoiu mós Unidade Polísia Marítima (UPM) tanba, bainhira iha rai maran asegura ona, ema sempre halo krime kontra bandu liuhusi tasi.
