Sekretariadu Estadu Igualdade no Inkluzaun (SEII) hasae koñesimentu konaba literasia dijitál hodi hamenus violénsia hasoru feto liuhusi plataforma online liuliu media sosiál sira.
Sekretáriu ba SEII Elvina de Sousa Carvalho dehan, violénsia ne’ebé akontese ba feto sira iha média sosial inklui ema publika foto maluk feto balun nian ne’ebe hatun sira-nia dignidade no fó impaktu ba sira-nian psikolojia.
“Ita hotu tenke hamutuk kria kondisaun ne’ebé mak amizade no kondisaun ne’ebé mak seguru ba feto no kabrik feto sira atu offline ka online,” nia heteten.
Nia haktuir média sosiál ne’e di’ak tebes hodi utiliza ba haklean ema-nia koñesementu, maibé iha fatin balun sai fali hanesan fatin ida ema halo violénsia hasoru feto no labarik feto sira.
“Kampaña ida-ne’e hodi hasa’e koñesimentu sosiedade nian hodi proteje feto no labarik-feto iha kualker situasaun no fatin,” nia hatete.
Aleinde SEII Elvina salienta katak mensajen kampaña nia pozitivu no atu hasae ema-nia koñesementu, tanba feto no labarik-feto barak mak sai vitíma ba violénsia online ezemplu liuhusi plataforma dijital inlui Facebook, WhatsApp, no seluk tan hodi hatun dignidade feto nian.
“Kampaña ho tema hasae ema-nia konsiénsia literasia dijitál no sguransa ba feto labarik feto importante tebes ba sosiedade atu bele hatene,” SEII Sousa informa.
Entretantu Xefe UN Women iha Timor-Leste Amy Nistha Satyam dehan, UN Women apoiu SEII hodi kombate violasaun kontra feto no labarik feto, tanba ne’e violasaun grave kontra diretu humanos.
“Ita tenke hanoin katak feto la’ós minoria atu hetan abuja no feto ne’e konpostu husi 50% populasaun,” nia salienta.Nia hatete, feto tenke iha diretu atu koalia no atu hatais saida mak sira-nia hakarak, no atu hato’o sira-nia hanoin saida mak sira hakarak.
