Servisu Migrasaun (SM) submete ona sidadaun estranjeiru hamutuk na’in neen (6) ba prosesu iha Ministériu Públiku (MP), tanba utiliza sala vistu.
Diretóra Jerál SM Superintendente Asistente Adelaide da Rosa dehan, sidadaun estranjeiru na’in 6 ne’e ekipa SM identifika iha Oecusse tanba sira utiliza vistu turista hodi hala’o servisu profesionál balun.
“Sidadaun estranjeiru na’in 6 ne’e husi nasaun Indonézia, ita halo kapturasaun no halo ona prosesu ba Ministériu Públiku hodi kontinua prosesu ba Tribunál,” nia hatete.
Nia informa depois de halo kapturasaun ba sidadaun hamutuk na’in 6 ne’e, ekipa SM notifika mós kompañia ne’ebé viola lei migrasaun no azilu hodi fó servisu ba sidadaun estranjeiru sira ne’ebé utiliza vistu turista hodi halao servisu profesionál iha Oecusse.
“Kompañia ne’ebé ita notifika ne’e kompañia estranjeiru ida, nia halo violasaun ba Lei Migrasaun no Ázilu númeru 11/2017. Tanba ita aplika kedas sansaun selu multa tuir aktu krime ne’ebé sira halo,” Diretóra Jerál SM Rosa informa.
Nia dehan, ekipa konjunta mós rekolla ona sidadaun estranjeiru hirak ne’e nia pasaporte hodi submete ba prosesu, tanba iha lei la fó dalan ba sidadaun estranjeiru utiliza vistu turista hodi halo kualker servisu profesionál iha territóriu nasionál.
“Ba oin ita kontinua halo operasaun hodi sidadaun estranjeiru hirak ne’ebé mak halo servisu iha Timor-Leste,” nia informa iha Vila-Verde, Díli.
Alende ne’e nia dehan, kompañia hirak ne’ebé eziste iha Timor-Leste atu fó servisu ba traballadór, sira tenke kompleta sira-nia dokumentu liu-liu ba trabalhadór internasionál sira atu nune’e labele mosu problema hanesan ne’e.
Entretantu, komunidade Mariano Martins dehan, servisu migrasaun tenke halo operasaun intensiva hodi identifika sidadaun estranjeiru sira-ne’ebe utiliza vistu turista hodi halo servisu no tenke submete ba prosesu.
“Tenke halo ida-ne’e hodi fó oportunidade ba joven sira bele asesu ba kampu servisu, tanba ami joven barak mak dadaun ne’e lahetan servisu,” nia dehan.Nia dehan, bainhira governu haruka sira fila mak oportunidade ba joven timoroan sira hodi hetan servisu, tanba servisu ne’ebé mak sidadaun estranjeiru sira halo ne’e jovem timoroan sira mós bele halo maibé laiha oportunidade.
