Ministériu Edukasaun (ME) sei halo revizaun ba kurríkulu nasionál Ensinu Sekundáriu Jerál no Ensinu Sekundáriu Téknika Vokasionál (ESJ-ESTV) ni’an iha tinan 2026 hodi hadia atinjimentu kualidade edukasaun iha rai laran.
“Kurríkulu ESJ-ESTV implementa iha tinan 2014 no to’o ohin loron ministériu seiduak halo revizaun. Tanba ne’e presiza halo revizaun ba kurríkulu refere hodi hadia sistema ensinu iha eskola,” Ministra ME, Dulce de Jesus Soares informa.
Nia dehan, iha kurríkulu anterior ne’e iha revizaun presiza hasai tiha parte balun ne’ebé la kontribui ba kualidade no presiza inklina parte hirak ne’ebé impaktu ba kualidade ensinu nian.
“Ita sei la muda totál, maibé ita presiza hasai de’it parte balun no parte balun ne’ebé mak di’ak ona ita hadia de’it,” nia salienta.
Nia hatete, iha prosesu revizaun kurríkulu ne’e inklina mós parseiru no péritu internasionál sira hodi kontribui ideia ba dezenvolvimentu edukasaun.
Enkuantu nia dehan, kurríkulu siklu datoluk klasse 7⁰ Ano revizaun hotu ona no hein implementa de’it iha tinan 2026 no formasaun ba profesór sira mós finaliza ona.
Iha parte seluk Koordenadór Rede Edukasaun Timor-Leste Coalition for Education (TLCE) José Monteiro dehan, kurríkulu eskolár ne’e tuir loloos kada tinan 5 tenke halo revizaun hodi haree nia implementasaun.
“Kurríkulu ne’e implementa kedan iha tinan 2014 seidauk iha revizaun hodi haree nia progresu implementasaun ne’e oinsa vantajen iha ka lae,” nia dehan.Nia salienta, kurríkulu ne’e mak sai xave ba dezenvolvimentu kualidade edukasaun, tanba ne’e presiza halo revizaun kada tinan tolu ka lima.
