Ministériu Edukasaun (ME) ho parseiru sira hasa’e koñesimentu estudante feto sira iha eskola ensinu sekundáriu tékniku vokasionál (ESTV) nian kona-ba oinsa realiza no partisipa iha atividade ekonómika iha rai laran.
Ministra ba ME Dulce de Jesus Soares dehan, kapasitasaun refere hodi hakbiit juventude rurál liu-liu estudante feto sira hodi bele hametin ekonomia uma laran.
“ME ho parseiru realiza programa ida hodi hasa’e estudante feto sira liu-liu iha ESTV nia koñesimentu hodi partisipa iha atividade akonómika,” nia informa.
Nia informa programa ne’e husi Ministériu Edukasaun liuhusi kooperasaun ho Konsellu Británika ba ASEAN no UN Women halo formasaun STEP ka treinamentu ida kona-ba partsipasaun ekonómika ne’ebé fokus liu ba labarik feto sira husi ensinu sekundáriu Tekniku vokasionál no profesór sira hotu.
“Formasaun ba estudante sira hodi oinsá bele koñese litérasia finanseira no dezenvolve emprendedorizmu nune’e aban bainrua remata sira-nia estudu, bele uza abilidade ida-ne’e hodi dezenvolve ekonómika ba sira-nia an,” Ministra ME Soares dehan.
Nia hatete, estudante sira hetan koñesimentu konaba marketing, komunikasaun no produsaun produtu oin-oin no modernu tebes, tanba sira halo sukaer sai ba saos.
Iha fatin hanesan, Reprezentante Konsellu Británika ba ASEAN Rebecca Hales dehan, projetu ida-ne’e hetan apoiu husi UK SAGE hodi promove labarik feto sira liu-liu iha nasaun ASEAN.
“Iha Timor-Leste ami agradese tebes, tanba servisu di’ak ho Ministériu Edukasaun hodi implementa projetu ida-ne’e nomós bele hetan rezultadu balun liuhusi profesór sira-nia mudansa bainhira hanorin iha sala laran,” nia dehan.
Enkuantu atividade treinamentu no feira emprendedorizmu ne’e hala’o no hetan partisipasaun husi estudante feto sira iha ESTV hamutuk atus-hitu-walu-nolu-resin-sia (789) no profesór sira.
Entretantu, Maria Ello dehan, hanesan estudante katak kapasitasaun hodi prepara sira ba futuru bele loke rasik negósiu nune’e mós fó servisu ba ema seluk.
“Ida-ne’e hanesan buka’e ida mai ami hodi bele realiza ami-nia atividade akonómika hodi hetan lukru ba ami-nia an no família,” nia hatete.Nia dehan, presiza kontinua hala’o beibeik atividade hakbiit estudante feto sira-nia koñesimentu kona-ba área akonómika.
