Governu Australia liuhusi Timor-Leste Police Development Programm (TLPDP) no Federal Police (AFP) apoiu Closed Circuit Telivizaun (CCTV) movel ba Polísia Nasionál Timor-Leste (PNTL).
Ministru ba Ministériu Interiór (MI) Francisco da Costa Guterres hatete, durante ne’e PNTL iha kooperasaun ne’ebé di’ak ho TLPDP, no sira hare katak servisu kontrolu polísia nian presiza ekipamentu vijilansia ne’ebé mak modernu hodi fasilita sira-nia servisu kontrolu krime iha kapítál Díli.
“Ohin governu Austália liuhosi TLPDP no AFP apoiu Closed Circuit Television (CCTV) ba Polísia Nasionál Timor-Leste (PNTL) hodi kombate aktu krime iha kapítál Díli,” nia informa.
Nia hatete, ekipamentu CCTV refere ba PNTL bele reforsa liutan sira-nia servisu ho di’ak nune’e bele garante sidade Díli sai sidade ne’ebé livre no seguru ba ema hotu hodi halo atividade tantu iha kalan no loron.
“Husu PNTL atu kuidadu didi’ak ekipamentu hirak ne’ebé parseiru Austrália sira apoiu, nune’e ba oin bele utiliza iha tempu naruk, hodi hafasil kontrolu iha Díli laran,” MI Guterres informa.
Nia dehan, durante ne’e PNTL iha difikuldade boot, bainhira mosu problema krime sira iha Díli laran no susar atu deteta autór sira, nune’e ho apoiu mobile CCTV ne’e espera katak, lalais deteta bainhira mosu krime.
“Mobile CCTV ne’e sira apoiu ba iha Polísia Nasionál Timor-Leste ne’ebé mak bolu katak, camera kontrolu CCTV ne’ebé “Movel” ne’ebé sira sei entrega CCTV sira iha Díli laran tomak, kuandu iha situasaun ruma akontese sira bele la’o dadauk hodi bele kontrola,” nia salienta.
Nia hatete CCTV ne’e, ligasaun ho mobile telefone ne’ebé mak designadu ona, hodi hafasil sira kontrola problema ne’ebé akontese iha fatin ruma.
“Ida-ne’e pasu pozitivu ida ne’ebé mak di’ak tebes, bainhira ema baku malu sira bele ba haree hodi halo atuasaun, entaun objetivu sira apoiu ekipamentu eletróniku hirak ne’e bele tulun ita-nia poísia sira halo servisu,” nia informa.
Nia dehan, Mobile CCTV ne’e hamutuk rua, ida sei instala iha sentru operasaun komando PNTL, ida bele monta iha fatin ne’ebé determinadu.
Entretantu, Komisáriu Adjuntu Krime husi Austrália Federal Police (AFP), Ian McCartney, dehan apoiu refere nu’udar koperasaun bilateral entre Austrália ho Timor-Leste, nune’e oinsa bele reforsa servisu autoridade seguransa nian.
“Ohin ita mai hodi hatudu katak, AFP no TLPDP fó mos ekipamentu ne’ebé ohin ita haree hodi ajuda PNTL, para sira bele hala’o servisu sira ne’ebé di’ak liutan, tanba ho mobile CCTV ne’e bele deteta lalais problema sira,” nia informa.Nia hatete, ba oin TLPDP no AFP prontu nafatin servisu hamutuk ho PNTL no sei apoiu nafatin PNTL iha ekipamentu no formasaun sira.
