Ministru Ministériu Interior (MI) Francisco da Costa Guterres dehan, atu kombate krime organizadu iha Timor-Leste governu hala’o ona enkontru no Austrália Federal Police (AFP) hodi apoiu Polísia Nasionál Timor-Leste (PNTL) hodi identifika rede organizadór ba krime.
“Austrália Federal Police (AFP) apoiu kombate krime organizadu iha Timor-Leste inklui rede jogu online sira,” nia informa.
Nia dehan, krime organizadu mak sempre akontese iha Timor-Leste nune’e mós iha rai seluk mak hanesan, tráfiku umanu, tráfiku droga, jogu online sira no presiza kombate.
Nia hatete, krime organizadu sira ka krime transnasionál sira, públiku hatene ona katak, foin lalais konsege desmantela rede balu, mais tenki kontinua atensaun nafatin ba rede sira-ne’e.
“Atu kombate krime organizadu sira liu-liu jogu online ne’e, dadaun ne’e governu hasai tiha rezolusaun ida kona-ba taka tiha jogu online ilegal sira-ne’e, no fó dalan ba Diresaun Servisu Investigasaun Kriminál sira para hodi halo atuasaun para buka tuir autór sira,” nia informa.
Nia dehan, Austrália promete sei ajuda Timor-Leste atu eleva kapasidade investigadór sira hosi orgaun Polísia Kriminál nian, oinsa atu deteta informasaun sira, iha servisu informasaun no sira mós promete iha ekipamentu balu sira sei apoiu para ajuda deteta jogu online ilegál sira.
Iha fatin hanesan, Komisáriu Adjuntu Krime Australia Federal Police (AFP) Ian McCartney, hateten, koperasaun bilateral entre Timor-Leste ho Australia durante ne’e di’ak tebes.
“Koperasaun ida-ne’e importante atu bele hetan konkordansia di’ak ida, tanba evolusaun iha rejiaun ne’e hatudu katak, ita hotu-hotu hasoru desafiu ne’ebé mak maka’as iha krime organizadu ho buat sira seluk,” nia informa.
Nia hatete tenke mantein koperasaun ne’ebé forte hodi bele hasoru desafiu sira, nune’e Embaixada Australia iha Timor-Leste kolabora di’ak ho Governu hodi apoiu maka’as intermus politika, téknika nomós parte segura, nune’e buat hotu la’o kapaas tebes.Enkuantu nia dehan, Timor-Leste no Austrália iha komitmentu bo’ot hodi kombate krime organizadu no tráfiku umanu inklui mós jogu online sira.
