Primeiru-Ministro (PM) Kay-Rala Xanana Gusmão husu Asosiasaun Kurida Kuda Oecusse Ambeno (AKKOA) ba futuru tenke prodús ai-han ba kuda kompetisaun sira.
“Husu ba AKKOA tenke kria polítika hodi prodús ai-han ba kuda sira nune’e bele kompete ho kuda sira husi Nusan Tenggara Timur (NTT) nian,” Xefe Governu Xanana informa iha Tono Oecusse.
PM Xanana Gusmão salienta katak liga ba kompetisaun kurida kuda ne’ebé realiza iha Oecusse ne’e maioria kuda husi Oecusse maioria to’o metru ida liu de’it, maibé kuda sira husi NTT ne’e metru rua liu, ho ida ne’e kompetisaun ladun di’ak.
PM informa, kuda sira husi NTT ne’e priense duni padraun kurida kuda nian, tanba kuda isin di’ak no halai mós di’ak.
“Ha’u nafatin enkoraza imi [AKKOA], tanba imi iha ona vizaun ho esforsu boot, apresia tebes imi-nia esforsu, imi-nia hanoin, halo nafatin ba, husu de’it katak imi-ne’ebé organiza bele halo kompetisaun, maibé prepara mós hahán ba kuda sira,” nia hatete.
Iha fatin hanesan, Prezidente AKKOA, Mario Muni Salu, informa, sira-nia assosiasaun iha ona akordu ho parseriu ida husi Indonézia hodi apoia ho sira-nia péritu atu halo formula ai-han ba kuda nune’e bele fasílita kuda na’in-sira hodi fó han kuda.
“Ita fó oportunidade ba agrikultór Cunha Lalisuk ne’ebé besik árena ne’e bele investe mós ai-han ba kuda, ema hotu bele sai investor atu partisipa iha investimentu ho prezerva árena kuda nian,” nia salienta.
Nia dehan, iha tinan 2026 AKKOA garante katak ai-han ba kuda sira iha ona hodi fasilita kuda na’in-sira fó han tuir menu ne’ebé iha tuir péritu sira fó.
Aleinde ne’e nia dehan, kompetisaun kuda ne’ebe AKKOA realiza hodi enkoraza kuda na’in-sira atu kontinua haki’ak kuda nune’e mós utiliza sai hanesan transporte kulturál iha Oecusse.
Iha parte seluk, kuda na’in Maria Elu dehan, baibain sira fó han kuda ne’e tuir duni menu ne’ebé sira kria rasik, hanesan, duut, hare uut no batar no bee.
“Dader san hare uut ho batar, meudia duut, lokraik, hare uut kahur ho batar,” nia dehan.
Nia informa la’ós prepara ai-han de’it maibé fó haris mós kuda loron tolu dala ida depois kuda sira tau iha luhan laran no lahusik iha liur.”Ami iha kuda tolu ne’ebé mak durante ne’e partisipa iha kompetisaun kuda iha Oecusse, Covalima nune’e mós Kupang Rote,” kuda nain Elu dehan.
