Ministru ba Ministeriu Agrikultura, Pekuária, Peska no Floresta (MAPPF), Marcos da Cruz, entrega ekipamentu agríkola inklui ró peska unidade sanulu (10), tratór boot unidade tolu (3), mákina ko’a hare no sama hare unidade lima (5) no mákina kuda hare unidade sanulu (10) ba Munisípiu Viqueque, atu moderniza área agríkola no hasa’e produsaun agrikola nasionál.
“Ita oferese ba PAM Município Viqueque hodi jere ekipamentu sira-ne’e hodi distribui tutan ba ita-nia agrikultór sira, entaun liuhusi fornese ekipamentu sira-ne’e atu hadi’ak mekanizmu no téknika agrikultura iha nivel munisípiu.
Ami hanoin katak, ho ekipamentu sira ne’e, agrikultór sira iha Viqueque bele kultiva ho efisiénsia ne’ebé aas liu no aumenta produsaun,” Ministru Marcos hateten hafoiun halo vizita ba komunidade sira iha Munisípiu Viqueque.
Ministru haktuir katak autór ba dezenvolvimentu setór agrikultura mak ia agrikultór sira.
“Ho ida-ne’e ha’u husu ba agrikultór sira atu badinas no ativu iha toos, natar, haki’ak ikan, haki’ak animál no kaer ikan iha tasi, tanba ekipamentu sira ne’ebé mak governu fó ba ne’e imi atu uza hodi halo servisu sira-ne’e,” nia hato’o.
Iha fatin hanesan, Prezidente Autoridade Munisipiu (PAM) Viqueque, Francisco de Gonzaga Soares, salienta katak ekipamentu sira-ne’e refere uza ho di’ak tebes hodi hasa’e kapasidade produtivu no rendimentu ba produtór sira iha Viqueque.
“Ami hamutuk ho povu Viqueque, simu ho laran ajuda importante ida-ne’e, ekipamentu sira-ne’e sei sai ferramenta estratéjika ida atu hametin ekonomia iha rai-laran nian no redús depende ba importasaun ai-han. Ami kompromete atu garante katak ekipamentu sira-ne’e ba ho loloos ba agrikultór sira ne’ebé presiza,” Prezidente Soares hateten.
Nia hateten, Viqueque iha rai potenssial barak, tanba ne’e liuhusi ajuda hirak ne’e, agrikultór sira bele utiliza rai pontesial sira ho di’ak, tanba durante ne’e la iha ekipamentu entaun komunidade sira-ne’e uza de’it ekipamentu tradisional hodi halo to’os no natar tuir sira-nia forsa.”Viqueque iha poténsia ba setór agrikultura, ita iha tasi, rai-maran. Liuhusi setór ida-ne’e Viqueque bele fó han ba aan rasik. Nune’e, autoridade munisípiu sei esforsu hodi hasa’e potensialidade sira no lori produtu lokál ba merkadu,” nia dehan.
