Maske Governu promete katak iha loron 28 Novembru ahi sei lakan 24 oras, iha fatin balun iha capital laran rasik hanesan parte Becora, Taibessi, no moss Metinaru ahi sei mate nafatin.
“AMP tomak, hotu-hotu koalia, sira rasik hatete katak 28 Novembru ne’e Dili laran tomak ahi sei lakan permanente 24 oras klaru, maibe horseik dia 28 ne’e ahi iha fatin balu mate, ahi iha fatin balu lakan. Ohin kalan iha dia 29 dader ne’e hau simu telefone husi ema barak husi populasaon Dili laran. Hau lahatene se, sira la tau naran, maibe sira dehan ahi mate iha Bidau, iha Taibesi, iha Becora ahi mate,” hateten Deputadu Anicetu Guterres, FRETILIN, semana kotuk (29/11), iha Parlamentu Nacional, Dili.
Deputado Guterres hakarak hatene lolos promesa katak ahi lakan permanente 24 oras iha 28 Novembru nia rezultado oinsa tamba povu balun seidauk komprende atu nune’e  husi guvernu tenki esplika para labele kria duvidas iha povu nia let.

Leia mais...

Membru Parlamentu Nasional liu husi bankada FRETILIN hateten proposta nebe Governu aprezenta ba plenaria foin dadauk atu husu atu impresta osan hosi rai liur ninia impaktu mak sei tau todan ba jerasaun foun tuir mai.
“FRETILIN ninia pozisaun klaru, la konkorda politika ida ne’ebe hakarak deve,” hateten Deputadu bankada FRETILIN, Inacio Moreira, iha PN semana kotuk (1/12).
Deputado Moreira dehan nudar bankada opojisaun sei koalia makas konaba politika Governu Aliansa Maioria Parlamentar (AMP) hakarak deve osan.

“Ita kuandu deve ema nia sasan, ne’e dehan hanesan dividas nebe sei husik hela ba ita rasik no mos ba jerasaun nebe mai tuir.”
Deputado Moreira haktuir tan katak politika Governu AMP nia hakarak deve tanba inkapasidade halo planu.
“Ita nia osan fundu Minarai nian iha, iha neba lei la bandu para halo investimentu.”

Leia mais...

Durante tinan sanulu resin povu Timor-Leste moris iha nakukun laran maibe ho esforsu bo’ot Governu Timor–Leste hahu ona koko oferese elektrisidade ba povu tomak iha rai laran maske seiduak funsiona hotu maibe tempu mos to’o ona atu povu labele uza eletrisidade ho gratuita (la selu) maibe povu tenke iha konsensia atu kontribui liu husi selu tarifa elektrisidade ne’ebe sira uza.

“Ita hotu tenke hanoin liu-liu bo’ot sira hanesan emprezariu sira ne’ebe iha vensimentu diak atu selu maibe ita hotu-hotu tenke selu tanba atu Estado fo servisu oioin ba povu tenke iha impostu. Ita hotu tenke kontribui katak Estado fo elektrisidade ita tenke fo osan oituan para selu gasoline. Tenke tau kakutak tanba tempu to’o ona ita hotu simu responsabilidade,” hateten Prezidente da Republika Jose Ramos Horta, semana kotuk (28/11) iha Palasio Pezidensial Aitarak Laran, Dili.

Leia mais...

Diretor Jeral STAE (Sentru Tekniku Apoio ba Eleisoens), Tomas do Rosario Cabral hateten katak eleisaun iha rai liur bele akontese fila fali iha 2017 tanba horas ne’e dadauk seidauk iha posibilidade atu organiza eleisaun iha rai liur.

“Ida ne’e mak mudansa ida importante tebe-tebes no mudansa ida tan mak ita vota iha unidade jeografika. Rejistu iha nebe tenki vota iha neba,” hateten Diretor Cabral, iha STAE nia servisu fatin iha Caicoli, Dili, semana kotuk (2/12).

Diretor Tomas dehan mos katak atualizasaun baze de dadus ne’ebe horas dadauk lao iha loron sanulu resin lima fulan Dezembru sei taka ona.
“Ita iha Janeiru iha eksibisaun mudansa para ema hotu-hotu ba hare sira nia naran los ga lae, naran iha lista ga lae,” hatutan tan Diretor Cabral.

Leia mais...