- Publika iha: 08 Setembro 2011
Tuir Diretora Nasional Relasaun de Traballu Sekretariu Estadu Formasaun Profesional no Empregu (SEFOPE) Auxiliadora Gusmao Guterres, katak pagamentu Tunjangan Hari Tua (THT) ba eis funsiunariu Indonezia II faze sei hala’o iha tinan ne’e.
Iha loron 27-28 Jullu, reprezentante husi SEFOPE nian halo ona diskusaun ho governu Indonezia iha Makasar-Sulawesi.
“Iha enkontru ne’e PT Asabri, PT TASPEN no PT Jamsostek prontu atu transfere osan ba nia eis funsiunariu sira no tuir planu sei selu iha tinan ne’e maibe ami sei hare kalendariu ba ajenda ne’ebe apropriadu hodi halo pagamentu,” informa Diretora Auxiliadora Gusmao Guteres, semana kotuk iha Kaikoli, Dili.
Maibe antes halo pagamentu, governu Indonezia sei haruka lista naran funsiunariu sira nian foin bele selu tuir lista ne’e.
Entretantu tuir Deputadu Antonio Bianco, katak selu THT la’os kompetensia governu Timor-leste nian maibe ne’e Indonezia nian.
“Osan Tunjangan ne’e, osan ne’ebe uluk koa ful-fulan husi salariu funsiunariu sira nian entaun ne’e direitu sira nia atu simu e Indonezia tenke fo fali sira nia osan,”Bianco katak.
Alende ne’e tuir eis funsiunariu Indonezia ne’ebe uluk servisu iha Administrasaun Distritu Dili (Pemerintahan Daerah Tingkat II Dili) ne’ebe lakohi publika nia identidade, katak nia parte servisu desde 1989, maibe nia naran iha lista laiha.
“Iha pagamentu ba primeira faze ne’e hau nia naran laiha lista, balun iha balun laiha, ne’ebe hau hanoin estadu rua ne’e tenke hare didiak,”nia preokupa.
Nia mos espera katak pagamentu iha segunda faze ne’e, funsiunariu sira ne’ebe seidauk simu iha primeira faze bele simu hotu sira nia direitu. “Ne’e ami nia osan, la’os estadu Timor-leste ka estadu Indonezia nia osan,”nia esperansa.
Tuir nia maske osan ne’ebe sira simu ne’e oituan deit maibe ne’e direitu sira nian e estadu Indonezia tenke fo fali.