- Publika iha: 16 Setembro 2011
Tuir Deputadu sira husi bankada Fretilin iha Parlamentu Nasional, katak maske grupu deskonesidu balun sunu bandeira partidu Fretilin nian iha Kampung Alor maibe sei la hasoru ho asaun violensia maibe husu ba liders partidus hotu atu kria unidade nasional hodi haburas demokrasia.
“Hau hanoin provokasaun hirak ne’e halo so para destabilize deit situasaun iha rai laran, tanba ne’e ami sei la halo reasaun ho violensia maibe husu ba ema hotu atu iha responsabilidade,”hateten Deputadu Inacio Moreira semana kotuk iha Parlamentu Nasional.
Akontesementu ne’e rasik akontese iha area Kampung Alor,Dili iha Kinta semana kotuk iha tuku 02:00 madrugada.
Nia dehan,Partidus Politikus (Parpol) hotu halao nia atividade partidus nian tuir normas ne’ebe iha, tanba ne’e husu ba ema hotu atu lalika provoka malu. “Diak liu ita hotu hamutuk hodi servisu ba ita nia partidus oinsa mak atu dezenvolve nasaun ida ne’e,”nia husu.
Maske nune’e provokasaun ida ne’e krime no polisia tenke halo investigasaun ba kazu ne’e hodi prosesa ba tribunal.
“Ne’e akontese ba dala rua nian, primeiru akontese iha mota ulun no sigundu akontese tan iha Kampung Alor ida ne’e hanesan provokasaun ida e hanoin polisia iha ona dadus atu bele kaer ema ne’e hodi investiga,” Inacio dehan.
Iha fatin hanesan Deputadu Fretilin, Francisco Branco hateten sunu bandera ne’e mesak provokasaun deit maibe Fretilin sei la halo reasaun.
“Ami la halo reasaun ba situsaun hakmatek ne’e maibe ami ba tiha ona vota iha loron 20 Agustu hodi hili ami liders partidu nian,” Branco katak.
Tuir nia, atu labele akontese situasaun hanesan iha futuru, polisia tenke halo kontrola iha estradas sira, iha bairo-bairo no iha fatin hotu.
Entretantu bainhira jornalista tenta konfirma asuntu ne’e ba iha Komandante Polisia Investigasaun Kriminal nian, Calistro Gonzaga maibe lakonsege tanba okupadu.