- Publika iha: 08 Setembro 2011
Atu hanoin hikas loron Forsa Armadas ba Libertasaun Nasional Timor-leste (FALINTIL) 20 Agustu 2011, estudante husi Universidade Oriental (UNITAL) hala’o atividade kari aifunan iha semiteriu Metinaro,Dili.
Tuir Fundador UNITAL, Julio Guterres, katak loron FALINTIL importante atu selebra tanba maluk falintil barak mate tanba ukun aan ida ne’e.
“Imi sira ne’e mak sei sai future nasaun nian, imi mak sei kaer universidade ida ne’e iha future, tanba ne’e estuda didiak nune’e bele dezempenha ita nia ukun aan ida ne’e ho dezenvolvementu,”hateten Julio Guterres semana kotuk iha Becora, Dili.
Julio hatutan, atividade kari aifunan ne’e foin primeira vez hala’o husi estudante UNITAL nian no iha liafuan rua mak esensial liu ba sira mak ‘liberta da patria no liberta do povu’ “maibe tansa mak ita sidauk liberta ita nia povu?, tanba ita nia povu barak mak sei kiak, sei beik,”nia preokupa.
Entretantu tuir Reitor UNITAL, Euclides Torezáo, maske nia parte hatama ona proposta ba iha Sekretariu Estadu Joventude no Desportu (SEJD) atu apoia ba atividades ne’e maibe seidauk aprova. “Ami mos hatama proposta ba iha NCBA e sira mak suporta transporte rua hodi ami hala’o ami nia atividade ida ne’e,”nia dehan.
Iha atividade ne’e, partisipantes sira mos jejun, la han, la hemu to’o atividade ne’e remata. “Uluk ita nia heroi da patria mos la lori buat ruma e sira mate ho kabun mamuk tanba ne’e ohin loron ita mos tenke sakrifika aan hodi la han,la hemu hodi fo onra ba ita nia heroi sira,”nia katak.
Iha fatin hanesan Azevedo Crisanto Sarmento Lino,Kordenador ba programa ne’e hateten, razaun hala’o atividade kari aifunan ba matebian falintil sira tanba sira nia universidade nia fundasaun mak Falintil.
“Ami lori aifunan ba iha semiterio Metinaro ba ita nia maluk sira ne’ebe mate liu tiha ona ,e ami mos iha sentidu no korazen katak liu husi matebian sira nia vida mak ita hetan diak,” nia dehan.