- Publika iha: 03 Setembro 2011
Fulan 4 ona lampu iha Palasiu Governu la funsiona, maibé Governu seidauk hadia to’o agora.
Tuir negosiante sira ne’ebé bai-bain fa’an iha area ne’e sente preokupadu ho lampu ne’e tanba impede sira fa’an sasan bainhira tempu kalan.
“Ahi ida ne’e la lakan fulan 4 ona no atu tama tan fulan lima maibé to’o agora Governu seidauk hadia,sa’tan agora Governu bandu ami atu labele fa’an iha tempu loron, ami tenke fa’an iha kalan maibé lampu mate halo ami fa’an sasan mós lakontente,” lamenta negosiante Roda 3 Julio Belo, semana kotuk iha Palasiu Governu oin.
Tanba ne’e nia parte husu ba Governu atu hadia lalais lampu hirak ne’e, nune’e sir abele fa’an sira nia sasan iha tempu kalan ho diak.
“Agora Polisia mós bandu ami labele fa’an iha loron ,tenke fa’an iha kalan de’it entaun halo lakan ahi sira ne’e para ami bele fa’an ami nia sasan iha kalan ga,” nia husu.
Iha fatin hanesan Sergio dos Reis estudante Univesidade Dili (UNDIL) hateten, eletrisidade ne’e la funsiona duni durante fulan 5 nia laran ona.
“Kalan-kalan ami mai tur iha Palacio oin maibé tur nakukun laran de’it tanba ahi la lakan,” Sergio dehan.
Preokupasaun hanesan mai husi Abraó Gusmaó,hanesan komunidade hateten Governu liu husi Administrasaun Distritu Dili bandu atu negosiante sira labele fa’an iha tempu maibé eletrisidade tasi ibun la funsiona.
“sira fa’an kalan wainhira ema ruma sosa sira nia sasan sira uja de’it sira nia lampra tanba ahi sira area ne’e la funsiona kleur tiha ona,”Abraó dehan.
Entretantu wainhira jornalista koko konfirma asuntu ne’e ba iha Sekretariu Estadu Eletrisidade Agúa e Urbanizasaun, Januario Perreira maibé lakonsege tanba laiha fatin.