- Publika iha: 08 Setembro 2011
Relasiona ho militante no simpatizante Partidus Politikus (Parpol) balun bainhira halo komboiu iha sidade laran la uza kapasete, tuir membru Parlamentu Nasional katak ne’e responsabilidade lideransa partidus sira oinsa bele orienta sira ho disiplina.
“Ita tenke tau helm atu salva ita nia vida kuandu uza veiklu sira,”hateten Deputadu Antonio Cardoso, semana kotuk iha Parlamentu Nasional.
Tuir Deputadu husi bankada Fretilin ne’e katak, iha komboiu ni alaran bainhira militantes ruma monu motor “ita ba justisa ita labele halo buat ida tanba ita kontra lei tranzitu nian, tanba ne’e atu labele akontese buat hanesan ne’e, ita nudar lider tenke hato’o ba iha militantes sira, liu-liu jovens atu iha disiplina bainhira halo komboiu,”nia sujere.
“Maibe kuandu militante no simpatizante sira mak la kumpri no la taka helem bainhira sa’e motor monu mate, familia sira labele mai ezizi fali lider partidus sira tanba sira rasik mak sala,”nia dehan.
Entretantu Deputadu Domingos Mesquita husi bankada Partidu Unidade Nasional (PUN) hateten, Partidus Politkus sira wainhira halo konsolidasaun tenki halo kordena ho polisia tranjitu sira atu nune’e bele kontrola.
“Hau hanoin sira halo komboiu mak sira la uja kapasete ida ne’e perigoju ba sira nia an “Domingos dehan.
Tuir nia, iha komboiu laran bele akontese dezastre tanba kareta no motor halai besik malu liu.”dalaruma sira monu mate liu tanba la uza kapasete,tanba ne’e atu salva vida husi mate tenke uza kapasete bainhira sa’e motor,”nia katak.
Entretantu bainhira jornalista koko konfirma asuntu ne’e ba iha Komandante Polisia Tranzitu maibe la konsege tanba la iha fatin.