- Publika iha: 30 Abril 2012
“Depois ita eziji nafatin tenki hadia, tenki halo, tenki ida ne’e, tenki ida neba, mais ita nia konsiensia nudar sidadaun ida para atu sente sasan ne’e ita nian, ne’e la iha,” hateten Deputadu Arao Noe, semana kotuk,(19/04) iha Uma Fukun, Dili.
Deputadu Noe dehan, dalaruma ema balun tuda rahun lampu sinais sira ne’e, maibe taka deit la fo hatene ba Polisia no DNTT nune’e bele foti sansaun ba ema ne’e.
“Ita hotu-hotu husik deit, depois hakilar ahi mate sinais sira ne’e la la’o,” Deputadu ne’e kestiona.
Tanba ne’e nia husu ba komunidade hotu-hotu, atu fo liman ba malu hodi kontribui ba estabilidade nasaun ninian, kontrola sasan sira nebe mak iha atu uza.
Entertantu Deputadu Paul Martins hateten, tenke hadia hotu lampu sinais tranzitu sira iha kapital Dili, nune’e bele evita asidenti.
“Ahi oan mate, hanesan ita hare iha Palacio Aitarak laran nian mos la funsiona, ida fali iha Colmera ne’eba mos la funsiona , sae mai iha Toko Marina nian mos la funsiona,” Deputadu ne’e dehan.
Tanba ne’e mak nia husu ba Governu liu-liu Ministeriu kompetente atu hadia fila fali lampu sira ne’e, atu nune’e labele fo impaktu ba movimentu transportes iha sidade Dili hodi hetan asidente .
Wainhira TDW koko konfirma asuntu ne’e ba iha DNTT maibe la konsege tanba Staf Senior Traffic, Joao Eugenio desloka tiha ona ba rai liur.