Kazu bis second hand ba Universidade Nasional tama ona iha Tribunal Distrital Dili

Relasiona ho Bis segunda mao ne’ebe atu fo ba Universidade Nasional Timor Loro sa’e fakuldade Engenharia, Universidade Nacional Timor Lorosa’e, UNTL, tama ona Tribunal Distrital Dili (TDD) atu halo juldamentu no sei hein atu hetan desizaun final.

Tuir etika judisial wainhira kazu ruma tama ona iha Tribunal atu tesi lian ema ida inklui mos Procuradoria ka Ministrus sira la bele pronunsia kona ba kazu ne’e.
“Ami, nein membru do Governo, nein funsionario Governo labele komenta,” hateten Ministro Educasaun, Dr. João Cancio Freitas, semana kotuk (9/12) iha Dili.
Tuir Ministro Freitas kazu bis second hand (uzadu) agora iha TDD to’o hein desizaun husi Tribunal fo sai.

Iha parte seluk Costancio nudar Dosente UNTL hateten katak kazu ne’e iha ona Komisaun Anti Korupsaun (KAK) no Tribunal Distrital Dili nia liman no agora sira mak agora ba oin bele resposabiliza ba kazu ida ne’e.
“Ami laiha ona kompetensia ou buat ida ho bis ne’e. Husi Bagian [Departamentu] Logistika rasik mos laiha ona buat ida kona ba bis ne’e tamba kleur ona ita koalia hela deit kona ba bis ne’e maibe nia rezultadu laiha hanesan deit,” hateten Dosente Constancio.

Entertantu tuiir Jose das Neves nudar Adjuntu Komisariu KAK katak kazu ne’e agora iha ona Tribunal no hein deit desizaun husi Tribunal mak bele fo sai no katak KAK mos la iha tan responsabilidade ba kazu ne’e tanba desizaun Tribunal mak desizaun aas liu iha rai laran.