- Publika iha: 04 Julho 2013
Polisia Servisu Investigasaun Kriminal to’o agora seidauk bele deskobre suspeitu ba kazu mutilasi (ema tetak isin lolon) ne’ebe akontese iha tinan 2012, tanba laiha ema ida mak hatene bainhira vitima sai husi uma.
Diretor Servisu Investigasaun Kriminal (SIK), Superintendente Calisto Gonzaga hateten, SIK fo duni prioridade ba kazu ne’e no agora prosesu la’o hela maibe seidauk kompleta tanba iha difikuldade barak.
“Hanesan informasaun, komunidade sira hakarak kolabora, so ke sira mos la hatene informasaun, e dezafiu seluk mak iha momentu vitima sai husi uma tuku hira mos familia la hatene,” Diretor SIK, Superintendente Gonzaga dehan, foin lalais, iha Kaikoli, Dili.
Vitima ho inisial MV ne’e sai husi nia uma iha Pantai Kelapa, iha loron Domingo, 15 Abril tinan 2012, iha tuku 08:00 kalan no hetan fali isin mate iha 20 Abril 2012, iha area Akanunu nian, iha Hera, Dili.
Vitima mutilasi ne’e hetan oho husi ema deskonesidu, ho kondisaun ulun laiha, ain rua no liman rua laiha hotu.
Diretor SIK hatutan, kazu ne’e defisil oituan tanba vitima nia motor hetan iha area Dolok nian (iha Kristu Rei nian sorin ba), enkuantu vitima nia isin mate deskobre iha Hera.
“Prosesu ne’e la fasil, ne’e duni presiza tempu ne’ebe maka naruk no tenke la’o neneik, nune’e bele bele hetan rezultadu diak,” Diretor SIK katak.
Entretantu Deputada Ana Ribeiro, katak ne’e servisu Polisia SIK nian, atu oinsa mak sir abele hetan suspeitu ba kazu ne’e.
“Ita hatene katak kazu ne’e kleur ona maibe to’o agora seidauk hetan suspeitu, maibe hein katak SIK nafatin esforsu atu hetan suspeitu, tanba ne’ e krimi ne’ebe maka grave tebes,” Deputada Ribeiro tenik.
Tanba tuir nia, wainhira kuandu la hetan suspeitu ba kazu ne’e, maka hafasil ema seluk mos atu halo hahalok sira hanesan ne’e iha rai laran.
“Ne’e duni tenke buka tuir mesmu la fasil, tenke hetan no arguido tenke ba hatan iha tribunal,” katak Deputada ne’e.