- Publika iha: 02 Julho 2013
Polisia Komunitaria Nasional dadaun ne’e fo hela treinamentu ba Ofisiais Polisia Komunitaria Sukus iha Distritus Covalima no Liquisa, kona ba oinsa bele kria seguransa iha bairo laran ne’ebe involve direitamente husi komunidade sira.
Komandante Polisia Komunitaria (POLKOM), Superintendente Boavida Ribeiro katak, objetivu husi treinamentu ne’e mak atu tau seguransa voluntaria iha suku-suku, hodi nune’e bele asegura ambiente ne’ebe maka seguru.
“Presiza treinamentu tanba ita atu koloka iha suku ida polisia ida, e ita iha 442 sukus, ne’e duni polisia atus hat hat nulu resin rua maka sei koloka iha suku-suku,” Komandante POLKOM, Superintendente Ribeiro, foin lalais, iha Dili.
Nia dehan, treinamentu agora la’o hela no hetan partisipasaun masimu husi ofisiais Polisia Komunitaria Sukus (PKS) iha distritu rua ne’e.
“Ita halo iha Distritu Liquisa no Suai, kuantidade kada distritu ne’e la hanesan tanba ita tenke hare numeru suku iha distrtiu idak –idak, hanesan iha Liquisa ita halo treinamentu ba ofisiais suku hamutuk 23 tanba iha ne’eba iha deit suku 23,” Komandante Ribeiro informa.
Enkuantu iha Distritu Covalima fo ona treinamentu ba ofisiais suku hamutuk nain 30, tanba sira iha suku 30, no hanesan mos iha Dili kuandu hahu halo treinamentu sei fo mos ba ema nain 50 resin tanba iha suku hamutuk 50 resin.
“Treinamentu ne’e sei halo kada distritu loron tolu, treinamentu ne’e atu fahe informasaun ba iha funsionamentu polisia suku no fo kapasitasaun ba sira, oinsa sira bele ba iha komunidade nia le’et atu servisu hamutuk ho komunidade hodi bele asegura seguransa iha suku laran,” Komandante Ribeiro esplika.
Iha lidun seluk Deputadu David Diaz hateten, prezensas polisia iha suku laran ne’e nudar inisiativa ne’ebe maka importante tebes.
“Nune’e bele halo asaun preventiva atu asegura seguransa iha suku laran, entaun ita tenke konkorda bila perlu ita hotu-hotu kolabora para sira nia servisu ne’e la’o los,” Deputadu Diaz dehan.
Maibe nia hatutan, bainhira halo atuasaun polisia sura labele viola direitus humanus tanba ne’e kontra lei ne’ebe iha. “Polisia iha direitu atu uja forsa, maibe la’os berlebih-lebihan,” Deputadu Diaz tenik.