- Publika iha: 27 Junho 2013
Vitima RGB tenke simu han basa husi nia parseiru ho inisial FS tanba la simu desizaun ne’ebe vitima foti hodi hakotu sira nia relasaun domin ne’ebe durante ne’e sira nain rua hala’o.
Iha julgamentu iha Tribunal Distrital Dili (TDD), vitima RGB deklara katak, iha dia 12 Setembru 2012, vitima husu para ho nia doben, e iha tempu ne’eba arguido nonok no simu deit, maibe iha dia 14 Setembru 2012, arguido ba hasoru vitima iha kampus Universidade Nasional Timor Lorosa’e (UNTL).
“Nia husu hau, tanba saida maka hau fo para ba nia e hau nonok deit, hanusa-hanusa nia basa kedas iha hau nia hasan,iha ema barak nia oin no iha momentu ne’eba hau sente atu pingsan tiha,” deklara vitima RGB, foin lalais, iha TDD, Mandarin, Dili.
Vitima RGB ne’e hatutan, durante sira nain rua hala’o relasaun domin, sira hasoru problema barak, tanba ne’e mak vitima hakarak husu para deit.
“Nia jeitu barak mak hau la gosta, hau sente ami nain rua la cocok, ne’e maka hau husu para, maibe nia kala la simu, entaun nia halo violensia mai hau,” dehan vitima RGB.
Iha fatin hanesan arguido FS rekonese katak, nia halo duni hahalok ida ne’e tanba nia hadomi tebes vitima.
“Hau labele bosok hau nia an, tanba hau hadomi duni nia no hau lakohi atu lakon nia, ne’e duni tanba hau nervosu ne’e maka hau halo hanesan ne’e,” deklara arguido FS.
Enkuantu relasaun domin ne’ebe sira rua hala’o ne’e, nia dehan besik atu tama ba tinan lima ona.
“Ami namora kleur ona, hau nia inan aman mos hatene hotu ona nia,” dehan arguido FS.
Ho ida ne’e arguido arepende,nia husu deskulpa ba vitima no promete sei la halo tan asaun violensia ida ne’e iha futuru.
Entretantu Juis Prezidente ne’ebe maka diriji julgamentu ba kazu ne’e desidi katak, tribunal husu ba vitima no arguido atu rezolve problema ida ne’e liu husi dalan familia tanba ho razaun fo pena ba arguido mos nia pena ki’ik.