- Publika iha: 25 Junho 2013
Polisia Servisu Investigasaun Kriminal dadaun ne’e identifika ona suspeitu nain rua ba kazu baku malu entre sekuriti sira iha Kedutaan Besar Republik Indonesia.
Diretor Servisu Investigasaun Kriminal (SIK), Superintendente Calisto Gonzaga, hateten hafoin liu husi prosesu investigasaun ne’ebe kleur e agora sira konsege identifika ema nain rua ba kazu ida ne’e.
“Depois de prosesu investigasaun la’o, ita konsege detein ema nain rua ba kazu ne’e,” dehan Diretor SIK, Superintendente Calisto Gonzaga, foin lalais, iha Kaikoli,Dili.
Kazu baku malu entre sekuriti husi Kedutaan Besar Republik Indonesia (KBRI) ho sekuriti UN house nian ne’ebe akontese iha dia 13 de Abril 2013 fulan kotuk.
Diretor SIK esplika, iha tempu ne’eba pur volta de tuku ida kalan grupu rua ne’e goza malu no trata malu, maibe tanba liafuan la han malu entaun ikus mai sira tuku malu e komu sekuriti husi UN house ladun satisfeitu ho forsa maior sekuriti KBRI nian, entaun iha tuku lima madrugada grupu rua ne’e asalta malu fali.
“Husi baku malu ne’e konsege halo rahun tiha vidru kuadru avisu iha KBRI nian,” dehan Diretor SIK ne’e.
Iha lidun seluk Deputadu Ana Ribeiro hateten, sai seguransa mos iha nia regras ne’e duni wainhira involve iha aktu sira hanesan ne’e konserteza hetan sansaun husi sira nia bo’ot.
“Kada institusaun ida atu fo kontratu ba ema se’e deit ne’ebe maka hakarak servisu sempre liu husi kontratu no iha kontratu ne’e deklara ona iha laran kona ba disiplina de servisu, kuandu involve iha aktu ne’ebe maka la diak tenke hetan sansaun,” dehan Deputada Ribeiro.
Deputada n’e mos louva ba servisu SIK nian ne’ebe konsege identifika kedas suspeitu ba kazu ne’e.