- Publika iha: 15 Outubro 2012
Ezekusaun Orsamentu Jeral Estadu (OJE) 2012 nian iha Ministeriu Justisa (MJ) atinji ona pursentu 70 (70%). “Orsamentu ne’e ami uza ba bens de servisu, ezekuta ba kapital menor, no ezekuta ba kapital dezenvolvementu ne’e barak los no item-item deit, ita bele dehan Ministeriu Justisa uza osan ne’e bele to’o antara 70% ou 80%, numeru lolos maka hau ladun fixa,” dehan Vise Ministru Justisa (VMJ) Ivo Valente, (25/09), iha Colmera, Dili.
Enkuantu ba Orsamentu Ratifikativu agora nian, VMJ ne’e dehan sira sei la husu ba barak, aserka de 101 mil dolares Amerikanu.
“Ami so iha sekretariadu foun ida, ne’ebe osan ne’e ba apoiu atividade sekretariadu nian no balun fo apoiu ba gabinete ministeriu nia bens de servisu, no salariu,” dehan Vise MJ ne’e.
Iha lidun seluk Prezidente Komisaun A Parlamentar, Deputada Carmelita Caetano Moniz hateten, Komisaun A sei hare hotu ezekusaun OJE 2012 nian iha ministeriu hotu.
“Ita hare kuandu sira nia ezekusaun orsamentu ne’ebe ke atinji ona 70% , hau sente ne’e diak, e ami mos sei hare ezekusaun orsamentu ne’e la’o tuir duni programa sira ne’e ga la’e,” dehan Prezidente Komisaun A Parlamentar ne’e.