- Publika iha: 15 Outubro 2012
Iha Orsamentu Jeral do Estadu 2013 nian, Governu liu husi Sekretariu Estadu Seguransa (SES), promote sei halo kazerna ba Polisia sira iha teritoriu tomak, no kada distritu sei halo uma 50.“Ami nia planu ,minimu kada distritu ida uma hamutuk 50, maibe depende ba nesesidade membru polisia iha ne’eba, kuandu membru polisia hamutuk 100 iha ne’eba entaun ita mos tenke diskute buat ne’e, tanba ita hotu hakarak atu polisia ne’e tenke konsentra iha fatin ida,” dehan SE Francisco Guterres, iha Parlamentu Nasional.
Maske nune’e tuir nia, ida ne’e la’os kestaun ne’ebe mak fasil, maibe presiza iha planu ne’ebe mak diak.
“Ami tenke formula didiak lai planu ida ne’e, tanba ita kuandu halo uma ba Polisia, ita la’os halo deit uma, maibe ita mos tenke hanoin mos kona ba buat baziku sira, hanesan ema ne’e ba hela iha uma ne’e oinsa, no se maka ba hela iha ne’eba, karik polisia ho nia familia, nia famili ida ne’ebe, ne’e nudar kestaun ne’ebe maka ita presiza hanoin hotu., no uma ne’e aat se maka ba hadia, no wainhira sira ba hela iha ne’eba ne’e governu maka fo hahan ba sira ga, sira hola rasik sira nia hahan,” SE Guterres esplika.
Nia dehan, uma ne’ebe maka sei halo ba polisia ne’e mos sei fahe ba rua, polisia ne’ebe maka iha ona familia ketak, no sira ne’ebe maka sei klosan ne’e ketak., “Ofisiais hela iha ne’be, kazadu hela iha ne’ebe, no mane oinsa, feto oinsa, tanba ne’e maka ami presiza halo politika ne’ebe maka klean liu tan para ita halo ho diak no jestaun mos la’o ho diak, atu nune’e sira ba servisu do’ok mos sira laran metin tanba sira nia familia iha fatin ne’ebe maka seguru,” dehan SE Guterres.
Tanba ne’e iha tinan kotuk, SES delega ona membru polisia balun ba aprende iha nasaun Papua Novagini,hare oinsa para fila mai bele aplika fali.
Entretantu Deputada Aurora Ximenes, apoia planu ida ne’e, nune’e polisia sira bele tau iha fatin dia deit no organizadu.
“Hau hanoin ne’e atensaun ne’ebe maka diak, tanba kuandu laiha kazerna, familia labele hamutuk no servisu mos sei la la’o ho diak,” dehan Deputada ne’e.
Tuir nia, la’os uma deit maibe presiza mos tau antensaun ba fasilidade iha fatin servisu, hodi nune’e sira bele hala’o sira nia knar ho diak.