- Publika iha: 15 Outubro 2012
Fundasaun Mahein (FM) sujere ba Instituisaun Polisia Nasional Timor-Leste (PNTL) atu muda tiha Polisia Komunitaria (PK) husi Departementu ba Unidade ida tanba sira nia servisu integradu ho komunidade, nune’e sira bele alarga sira nia funsionamentu ho diak iha sosiedade nia le’et. “Wainhira muda ba unidade ona, sira bele ezekuta rasik servisu no nia submete ba Komando Jeral no nia orsamentu ne’e klaru no hetan debate no hetan monitorizasaun husi Parlamentu Nasional,” sujere Diretor Ezekutivu FM, Nelson Belo, iha Balide, Dili.
Alende ne’e tuir nia, presiza mos hadia Lei Organiku ne’ebe maka regula Polisia Komunitaria nudar Departementu ida durante ne’e.
Razaun FM sujere atu muda PK ba Unidade tanba durante ne’e sira nia kanal iha deit capital Dili, enkuantu iha distritu sira laiha.
“Durante ne’e iha distritu ne’e rangkap deit husi Komandante Distritu. Tanba ne’e governu tenke altera lei organiku PNTL ne’ebe maka dehan Polisia Komunitaria ne’e liga ba Komandante Distritu sira,” sujere tan Diretor FM ne’e.
Entretantu hatan ba kestaun ne’e, II Komandante PNTL, Komisariu Afonso de Jesus katak, laiha diferente servisu entre sai Departementu no sai Unidade ida, importante mak servisu ho diak.
“Unidade ou Departementu misaun ne’e hanesan, la’os hare katak nia unidade ne’e maka servisu diak ou departamentu maka servisu diak, mais depende ba elementus ida-idak, ajenti idak-idak tenke iha inisiativa atu elabora no hakbesik aan ba iha komunidade,” hatan Komisariu de Jesus, iha Kaikoli, Dili.
Kona ba orsamentu, Komisariu rekonse katak sira iha duni orsamentu maibe oituan deit, tanba ne’e husu ba Governu atu bele tau atensaun.
“Nesesidade Polisia Komunitaria ne’e barak, wainhira ita ba distirtu presiza osan, pur ezemplu ba hasoru malu ho ferik katuas sira atu koalia asuntu ruma, ne’e presiza ita halo bua malus ruma, atu nun’e sira sente besik ho ita, ne’ebe ita atu hateke maran deit ga, ne’e susar,” Komisariu de Jesus katak.
Komisariu ne’e mos dehan, tuir lei organiku PNTL nian iha arigu 18 ne’ebe dehan, katak Polisia hotu-hotu inklui Komandante Distritus sira, sira mos nudar Polisia Komunitariu e sir abele hala’o servisu ida ne’e.