- Publika iha: 27 Setembro 2012
Komando Jeral Polisia Nasional Timor-Leste (PNTL), halo sorumutu ho Komandante Polisia Husi Distritu 13 kona ba submisaun ba Orsamentu Jeral du Estadu (OJE) 2013 nian.“Kuaze tinan-tinan halo sorumutu ne’e involve Komandante Distritus, inklui Komandante Departamentu no Komandante Unidades hotu, Fokal Point husi 13 distritus, hodi hato’o sira nia programa prioridade ba Orsamentu Jeral de Estadu nian,” dehan Komandante Logistiku PNTL, Superintendente Basilio de Jesus, (11/09), iha Kaikoli, Dili.
Tuir nia, submisaun ne’e bazea ba planu annual ne’ebe maka halo tiha ona iha semana hirak nia laran, no orsamentu ne’e sei koloka ba komponente prioridade hitu (7), iha primeiru komponente mak Komando Administrasaun, Komando Operasaun, Unidade especial, Unidade Patrullamentu Fronteira, Komando Imigrasaun no ikus maka Sentru Formasaun.
Entretantu Komandante Unidade Polisia Fronteira (UPF), Superintendente Xefe Agusto Gomes hateten, orsamentu ne’ebe maka sei aprova, sei koloka ba difikuldade ne’ebe maka durante ne’e UPF sira infrenta.
“Prioridade ida maka Radio Komunikasaun no ekipamentus seguransa hanesan kilat inklui kondisaun postu ne’ebe maka ladun diak durante ne’e, Komando no SES tenke fornese mos fardamentu ne’ebe maka diak no iha kualidade ba ami iha area fronteira, tanba ami sente moe wainhira hakat ba nasaun vizinhu ho farda ne’ebe maka bosan ona no nia kor mos komesa atu lakon,” Komandante Gomes tenik.
Tuir nia, wainhira ejiji para polisia atu servisu ho profesionalismu, maibe kondisaun rasik la sufsiente oinsa maka polisia ne’e bele hala’o nia knar ho diak.
“Espera katak planu no programa ne’ebe maka ami halo ona ne’e Parlamentu no governu bele konsidera no tau orsamentu tuir ezijensia ne’ebe maka iha,” Komandante Gomes esperansa.