- Publika iha: 19 Julho 2023
Fundasaun Mahein (FM) husu governu tenke legaliza kanal sira ne’ebé Timoroan sira uza hodi buka serbísu ba nasaun sira rai liur inklui Inglaterra, Malazia nomós rai seluk.
Diretór Ezekutivu FM, Nelson Martins, dehan presiza legaliza prosesu tratamentu dokumentu ba kanál sira ho dignu, nune’e sira bele sente seguru no income (osan) ne’ebé sira haruka mai ne’e bele dezenvolve Timor.
“Dezenvolve iha parte toku, parte ida família, segundu estadu, terseiru suporta estadu atu hamenus ki’ak iha ita rain. Tanba ne’e mak governu presiza tau matan,” nia dehan.
Tanba ne’e husu governu presiza legaliza prosesu rekrutamentu ba Timoroan sira, iha kanal saida de’it ne’ebé mak sira serbísu ba, tantu iha Inglatera, Malazia no rai seluk tanba sira servisu ho inisiativa rasik seidauk hetan legalizasaun husi governu hanesan ho Koreia no Australia.
“Atu legaliza prosesu sira-ne’e governu tenke tau instituisaun ida ne’ebé justu hanesan, Ministériu Negósiu Estranjeriu, no Sekretáriu Estadu Formasaun Profesional no Empregu (SEFOPE) atu nune’e Timoroan sira labele abandondu iha ema nia rain, hanesan foin lalalis akontese ba ita-nia maluk Timoroan balun,” Diretór Martins dehan.
Entretantu, joven Elvidio Jose da Silva dehan governu tenke iha ona hanoin hodi koopera ho nasaun sira hanesan, Inglaterra no nasaun seluk ne’ebé mak Timoroan sira servisu ba.
“Atu nune’e labele mosu tan, Timoroan sira ba serbisu iha ema nian nasaun ho ilegál depois ema deporta fila, balun mós sai vítima ba ajensia ilegál balun hodi hamosu tráfiku humanu,” nia dehan.
Tanba ne’e nia dehan, Timoroan hotu ne’ebé ba serbísu iha rai-liur hanesan, Inglaterra, Irlandia nune’e mós Malazia maské seidauk legaliza husi governu maibé sira mos kontribui ona impostu ba estadu, la’ós de’it traballadór sira iha Koreia no Australia.