Sexta, Março 01, 2024
Total visitors: 760811

Diretór Servisu Munisípal Agua, Saneamentu no Ambiente, Herminio Moniz Ribeiro informa ekipamentu no transporte modernu atu halo koleksaun ba lixu to’o ona iha rai laran tanba ne’e tempu badak sei entrega ba kompañia nasionál PAX atu halo servisu koleksaun lixu lixu provizorio ba fatin lixeira Tibar.

Diretór Servisu Munisípal Agua, Saneamentu no Ambiente, Herminio Moniz Ribeiro informa ekipamentu no transporte modernu atu halo koleksaun ba lixu to’o ona iha rai laran.

Nia dehan bainhira instala ona fasilidade lixu fatin no servisu koleksaun lixu lao diak ona mak sei aplika taxa ba komunidade.

“Ita iha hela faze diskusaun atu ita aplika taxa lixu nian. Agora dadaun ita sei hare hela dekretu lei numeru 2/2017 konaba sistema jestaun residues sólidos urbanu ne’e nia mekanismu aplikasaun taxa. Maibe iha dekretu lei ne’e pontu ida mak kordenasaun ho EDTL atu koleksaun taxa bele mai husi eletrisidade,” nia hateten iha servisu fatin Matadoru, Dili.

Nia hateten koleksaun taxa ba parte sira ne’ebé la inklui soe lixu iha pontu koleksaun públiku hanesan supermerkadu sira tenke iha diskusaun atu aplika taxa ba sira tanba sira lori rasik lixu ba iha tibar, maibe sira nia dever atu selu taxa.

Nia hatutan ekipamentu ne’ebé iha ona mak hanesan kareta koleksaun lixu bo’ot, tiga roda utiliza kolekta lixu iha bairo sira hamutuk 10, lixu fatin ho medida lahanesan hamutuk 1,000 no ekipamentu pessadu bulldozer atu halo servisu iha lixeira tibar.

Nia haktuir ekipamentu ne’e hatama husi kompañia internasionál China Nuclear (CN22) ho orsamentu hamutuk $7.6 miloens husi fundu infrastrutura. Servisu koleksaun lixu sei kaer husi kompañia internasionál China Harbour ne’ebé kolabora ho kompañia nasionál PAX.

Iha parte seluk, Xefe Suku Caicoli iha Postu Administrativu Vera Cruz Munisípiu Dili, Hipolito Marques Sarmento espera ho instalasaun fasilidade lixu fatin foun no ekipamentu modernu sira ne’e bele solusiona problema lixu iha sidade Dili.

Nia dehan sira iha iha lixu fatin eziste sufisiente hela ba komunidade sira, maibe la sufisiente ho lixu sira mai husi atividade ekonomika liu-liu loja no supermerkadu sira.

“Sira supermerkadu no loja bo’ot sira tenke kria rasik lixu fatin no tula lixu sira ne’e ba Tibar, maibe problema sira la fakar iha tempu loron sira soe lixu iha kalan. Entau aban bairua ita monta ona fatin lixu foun se mak soe ita sei kaer tanba iha ona CCTV,” hateten.

Nia hateten edukasaun no sensibilizasaun kontinua lao iha komunidade sira atu fasilidade lixu instala ona servisu operasaun lao ona komunidade sira tenke soe lixu iha fatin tuir orario ne’ebé iha ona.