ME Apoiu Ona Material Konstrusaun Ba EBF Fatuhada

Ministériu Edukasaun (ME) halo ona apoiu material konstrusaun ba eskola baziku filial (EBF) Fatuhada, Díli hodi halo konstrusaun, tanba eskola refere kondisaun grave ona.

Diretór Asaun Sosiál Eskolár no Asuntu Sanitária (DNASEAS) Joaquim Martins dehan, eskola ne'e ministériu halo apoiu, tanba liuhusi proposta ne’ebé husi parte eskola aprezenta no ekipa tun kedas ba observa direita no haree katak eskola refere presiza halo konstrusaun emerjénsia.

"Ita halo kedan apoiu material konsturasaun nune'e mos orsamentu mau de obra hodi konstrui fila fali Ensinu Baziku Filial Fatuhada," nia dehan.

Nia dehan, material konstrusaun ne’ebé ministériu apoiu ne'e hanesan, kalen zingku unidade 375, kalen unidade 50 no pregu xapeo kg 10.

"Ita haree kondisaun sala aula ne’ebé grave tebes mak eskola rasik halo pedidu ba Ministériu Edukasaun hodi bele apoiu material atu bele taka fila-fali uma kakuluk, nune’e estudante sira bele tuir prosesu aprendijazen ho di’ak," nia dehan.

Enkuantu eskola refere sei konstrui husi komunidade rasik la’ós kompañia.

Iha fatin hanesan Koordenadór Ensinu Báziku Filial Fatuhada Domingos Amaral hateten, eskola refere ho sala de aula 6, maibé kalen no plafon sira aat hotu ona no tempu udan estudante sira labele utiliza hodi tuir prosesu aprendizajen.

"Ami halo karta ba Ministériu Edukasaun hodi husu apoiu nune'e bele hadia fila fali kondisaun eskola nian halo di’ak, tanba dadaun tama ona ba tempu udan," nia hatete.

Tanba ne'e agradese tebes, tanba governu bele aselera lalais apoiu material konstrusaun nian, nune'e bele konstrui fali iha tempu badak molok tama anu letivu foun mós konstrusaun hotu ona no estudante sira bele utiliza ba prosesu aprendizajen.