Kondutór Transporte Públiku Obrigatóriu Utiliza Uniforme

Komandante Tránzitu Seguransa Rodoviáriu, Superintendente Asistente Luis da Costa hatete, kondutór transporte públiku sira tenke hadutu profisionalizmu liuhusi utilizasaun uniforme ne’ebé atribui ona.

"Obrigatóriu ba kondutór transporte públiku sira-ne'e tenke utiliza uniforme la’ós hetan polísia mak foin hakfodak utiliza uniforme, ida-ne'e la hatudu profesionalizmu," nia dehan.

Tanba ne'e nia dehan, dadaun ne'e ekipa tránzitu halo sweaping ba kondutór sira ne’ebé la uza uniforme sei aplika multa $75.

"Kondutór ne’ebé utiliza de’it kalsa sei hetan multa $35 no faru de’it $40 no la uza kompletu ne'e hetan multa 75," nia dehan.

Tanba ne'e husu ba kondutór sira katak hatene an, imi-nia profisaun mak motorista la’ós dehan hobi de’it ka buka rame de’it se ida-ne’e mak imi nia profisaun ona tenke hadomi atu nune’e Polísia Tránzitu labele prende bebéik imi.

"Ami hala'o orden bazeia ba lei kódiku Estrada, tanba ne’e ita hotu hakruk ba lei labele dehan polísia iha mak foin ita uza uniforme ne’e labele," nia saliente.

Entretantu, kondutór mikrolete 03 Almerico Amaral dehan, uniforme ne'e durante ne'e sira utiliza at ona, tanba kleur ona hahú husi tinan 2015 to'o ohin loron.

"Uniforme sira-ne'e kondutór balun nia sei kompletu maské nakles loos ona balun nian faru de’it, kalsa la iha, no balun uza kalsa de’it faru la iha tanba nakles ona," nia dehan.

Tanba ne'e husu ba governu karik bele prepara hela uniforme ba kondutór transporte públiku sira depois mak sosa fali atu nune'e nia dezeñu ne'e ida de’it se banhira suku rasik ne'e sei la hanesan.