Quinta, Junho 13, 2024
Total visitors: 766366

Komandante Tránzitu Seguransa Rodoviaria Nasional (DTSRN), Superientendente Asistente Luis da Costa dehan ba oin Polísia Tránzitu hahú aplika multa ho montante $50 ba kondutór transporte públiku hanesan, mikrolete, taxi no bus, ne’ebé fuma bainhira tula hela pasajeiru sira.

Komandante Tránzitu Seguransa Rodoviaria Nasional (DTSRN), Superientendente Asistente Luis da Costa dehan ba oin Polísia Tránzitu hahú aplika multa ho montante $50 ba kondutór transporte públiku.

Nia dehan, tabela infrasaun espesífiku hodi aplika multa ba kondutór transporte públiku sira ne’ebé sempre fuma hodi tula pasajeiru ne'e iha no hahú implementa ona.

Nia hatete, fuma iha transporte públiku ne'e risku tebes ba ema nia saude tanba pasajeiros sira ne'e kondisaun saúde ne'e la hanesan, balun moras, balun gravida, no ida-ne'e perigozu tebes.

"Ba oin ita aplika multa $50 ba kondutór transporte públiku sira ne’ebé mak fuma hodi tula pasajeiros sira, bazeia ba dekretu lei Numeru 14/2016 konba kontrolu tabaku nian.

Dadaun ne'e ita-nia ekipa iha ona terenu hodi kontrolu kondutór transporte públiku sira hanesan, mikrolete, taxi, no bus sira ne’ebé sei kontinua fuma hodi tula pasajeiru sira," nia informa.

Nia dehan, durante ne'e polísia seidauk aplika multa ba kondutór transporte públiku sira, tanba seidauk iha tabela infrasaun espesífiku hodi aplika multa maibé ba oin polísia hahú aplika ona.

"Ita husu ba kondutór transporte públiku sira tenke kumpri, tanba atu nune'e ema hotu ne’ebé asesu ba transporte públiku ne'e bele sente seguru," nia husu.

Entretantu pasajeira Maria da Costa dehan, maioria kondutór transporte públiku sempre fuma hodi halo sirkulasaun no sira la intrese ba pasajeiru sira-nia saude.

"Durante ne'e ha’u akompaña fuma iha transporte públiku sira-ne'e la’ós de’it kondutór sira maibé pasajeiru mane sira mós sempre fuma," nia dehan.

Tanba ne'e tenke aplika mós multa ba pasajeiru sira ne’ebé fuma iha transporte públiku la’ós ba kondutór de’it.