Governu Deside Halo Espansaun Ba Semitériu Públiku Becussi

Ministru Ministério Administrasaun Estatal (MAE), Tomas do Rosario Cabral hateten ekipa halo ona levantamentu ba rai hektar neen iha semitériu públiku Becussi nia kotuk atu halo espansaun atu responde ba preokupasaun públiku nian katak semitériu Becussi nakonu ona, hodi hein konstrusaun semitériu públiku Metinaro.

Ministru dehan, rai hektar neen ne’e, kompostu husi hektar haat propriedade estadu nian no hektar rua mak komunidade nian. Maibé iha ona konsensu entre governu no rai-nain.

“Agora ami buka hela orsamentu, tanba presiza kuaze $300,000 atu halo moru no endeminizasaun ba família sira, para responde lai iha kapital Díli, tanba ema husi munisípiu mate mós hakoi hotu iha Díli, tanba ne’e mak semitériu sira nakonu lalais de’it,” nia hateten iha servisu fatin Colmera, Díli.

Nia hateten espansaun ne’e sei bele aguenta tan tinan ida, hodi hein projetu konstrusaun semitériu públiku Metinaro, ne’ebé obra sei hahu hikas iha tinan oin 2024.

Nia hatutan governu sei aplika rekezitu ba semitériu públiku, liu-liu oráriu hanesan semitériu sei loke iha tuku 7:00 dader no taka iha tuku 18:00 lokraik.

Iha parte seluk, Prezidente Autoridade Munisípiu Díli, Guilhermina Filomena Saldanha Ribeiro hateten desizaun governu da-sia nian atu halo espansaun ba semitériu Becussi no ekipa halo ona levantamentu ba dadus.

“Horiseik identifika ona atu foti tan rai hektar rua resin husi rai-nain no kooperativu tebes,” nia hateten.

Nia hatutan ekipa identifika ona família uma-kain hamutuk lima mak hela iha laran, tanba ne’e governu sei ko’alia ho família sira-ne’e atu fó indeminizasaun de’it, tanba sira-ne’e mós hela iha rai estadu.