- Publika iha: 06 Setembro 2023
Prezidente Autoridade Munisípiu (PAM) Díli, Guilhermina Filomena Saldanha Rebeiro informa pesoal saneamentu na’in rua, foin lais ne’e, ba tuir formasaun kona-ba oinsá kuida no halo tratamentu ne’ebé di’ak ba jardin públiku iha Lisboa, Portugal.
Nia dehan programa formasaun ne’e hetan apoia finanseiru husi União das Cidades Capitais de Língua Portuguesa (UCCLA), iha Portugal, hodi nune’e sira fila fali mai Timor-Leste bele halo jestaun ne’ebé di’ak liutan ba iha jardin públiku sira iha sidade laran.
“Ita kuandu ko’alia kona-ba kuda aifunan, momentu ida-ne’e ami-nia funsionáriu ne’ebé hala’o servisu saneamentu sira-nia koñesimentu mínimu tebes halo tratamentu ba jardin, tanba ne’e mak ho akordu ne’ebé PAM-Díli ho UCCLA, Lisboa, ami-nia funsionáriu na’in rua ba tuir formasaun iha Lisboa atu aprende oinsa kuida jardin,” nia hateten hafoin partisipa reuniaun kona-ba aprezentasaun planu investimentu munisípiu, iha salaun Delta Nova Comoro, Díli.
Nia hateten sira sei oferese espasu ida ba iha funsionáriu na’in rua ne’e atu implementa matenek kuda aifunan no sai mós sentru aprendizajen ida ba pesoal saneamentu sira atu bele aprende kuida no tratamentu ba jardin sira.
Nia hatutan tinan 2023, orsamentu ba Planu Dezenvolvimentu Munisípiu (PDM) purvolta 80% hodi halo de’it manutensaun ba jardin sira iha sidade laran mak jardin 12 de Novembru Motael, Jardin Bebora, Jardin 5 de Maio, Jardin Largo Lesidere, ne’ebé barak mak entrega ona, hela de’it jardin Largo Lesidere mak obra sei la’o hela.
Nia haktuir tinan 2024, prevé mós orsamentu atu halo manutensaun ba jardin BJ Habibi no jardin mídia line, liu-liu kuda ai oan no aifunan sira.
“Primeiru-Ministru, Kay Rala Xanana Gusmão orienta ona atu muda estatutu pesoál saneamentu sira-nian atu sira la’ós de’it hamoos rai, maibé kuda mós aifunan no ai-oan sira,” salienta mos Ministru Administrasaun Estatal (MAE), Tomás do Rosário Cabral.