- Publika iha: 21 Maio 2014
Sekretaria Estado ba Promosaun Igualidade (SEPI), Idelta Maria Rodrigues, husu ba grupo feto ne’ebe produs tais Timor atu halo variedade ba presu tais nian, tenke apar ho ekonomia iha rai laran.
“Ema sei la hola imi nia tais bainhira imi fa’an ho folin ne’ebe karuun,” SE Rodrigues hateten, iha Mascarenhas, Dili.
Tanba, nia dehan, SEPI iha ona politika ida atu promove produsaun feto sira nian liu husi eventu importante sira, hanesan selebrasaun loron nasional ba feto, husu ema hotu atu uja tais.
“Maibe tais nia folin karuun tebes, ne’e problema ida ne’ebe grupo feto sira tenke konsidera,” SE Rodrigues sujere.
Nia dehan, kuandu tais fa’an ho folin karuun, susar ba ema liu-liu ba Timor oan sira atu sosa.
Realidade hanesan iha tinan kotuk SEPI hetan kritika maka’as husi esposa membrus governu sira, bainhira husu atu uja tais partisipa iha serimonia selebrasaun loron nasional feto, maibe sira dehan tais Timor karuun.
“La’os dehan imi atu fa’an imi nia tais baratu, la’e!, maibe fa’an tuir ita nia rendimentu no kapasidade ekonomia ema ida-idak nian,” nia dehan.
Governante ne’e mos konkorda, katak iha tais balun ne’ebe nia presu tenke karuun duni, tanba original, maibe la’os tais hotu.
Hatan ba kestaun ida ne’e, reprezentante Grupo Produsaun Tais, Adelina Freitas, katak tais hotu ho nia presu la hanesan, iha balun karuun duni tanba material sira ne’ebe uja mos presu karuun inklui mos kolen.
“Balun ami fa’an ho $50 no 60 no balun mos to’o $100, ami fa’an karuun oituan tanba ami kolen, maibe la liu husi $100,” nia hateten.
Nia hatutan, produsaun ki’ik sira hanesan karteiras, asesoris sira ne’e folin la karuun, ida bele kona $5 mai kraik.