- Publika iha: 10 Junho 2013
Estudantes finalist Departamentu Komunikasaun Sosiál iha Universidade Nasional Timor Lorosa’e sente preokupada tebes tanba dadaun ne’e sira sei menus dosente hodi fo orientasaun ba sira.
Arcanjo Caetano, estudante finalist Departementu Komunikasaun Sosial (KOMSOS) UNTL ne’e dehan, sira iha dosente nain sia maibe espesialidade iha deit nain tolu.
“Ha’u pessoalmente preokupadu, tanbá ne’e problema bo’ot ida ba departementu komunikasaun social, se bele diretór, vise departamentu tuur hamutuk hodi koa’lia ho fakuldade , vise dekanu akadémiku para diskuti kona-ba kestaun ne’e tanbá estudantes barak mak atu hakerek monográfia maibé dosentes sira atu orienta ne’e uitoan,” preokupa estudantes finalista Arcanjo Caetano, (29/04), iha Kampus lama, Kaikoli, Dili.
Entretantu Dosentes (permanente), Ananias Soares rekonese katak dosente menus teb-tebes hodi halo orientasaun ba estudantes finalist sira maibe iha tempu badak sira sei rekruta dosente foun.
“Se bele aumenta nain lima hanesan ne’e nune’e bele atende estudante finalist sira ne’ebe halo estajiu professional ita haree besik nain 50,” tenik Dosente Soares.
Dosente ne’e hatutan, estudante finalist sira presiza dosente atu halo preparasaun ba halo sira nia monografia.
Nia mos husu ba estudantes sira atu labele pániku, e universidade iha ninia planu ba iha Departamentu KOMSOS, prosesu aprendizajen, halo orientasaun ba estudantes halo nafatin.
“Estudantes labele triste maibé imi hatene saida mak imi nia dever atu halo no agora dadaun tópiku sira ne’e iha ona departamentu, atu halo selesaun depois aprova mak fó ba iha dosente orientadóres hodi kontinua ba hakerek sira nia proposál maibé sei iha desizaun xefe departamentu,” tenik Dosente Soares.