- Publika iha: 05 Junho 2013
Fulan hat ona programa merenda eskolar iha Eskola Ensino Baziku (EB) numeru 01 Distritu Bobonaro paradu tanba fos laiha.
Membru Komisaun F, (edukasaun, saude), Deputadu Joao Adriano levanta kestaun ne’e iha plenaria Parlamentu hafoin halo fiskalizasaun iha Distritu Bobonaro no Viqueque, semana kotuk.
“Ami enkontru ho Xefe Departamentu sira,governu lokal liu-liu husi edukasaun katak,merenda eskolar paradu desde fulan Janeiro to’o agora,” dehan Deputadu Adriano Joao, iha PN.
Tanba ne’e nia husu ba Ministeriu Edukasaun, ho Orsamentu Jeral Estadu 2013 ne’ebe foin dadaun aprova ona, bele reativa fali programa merenda eskolar iha eskola refere.
Deputadu ne’e mos sujere, atu merenda eskolar ba tinan ida ne’e tenke iha nia kualidade, tanba durante ne’e aihan hanesan koto da’an oras tolu nia laran mos la tasak, tanba koto ne’e tuan.
Iha fatin seluk Program Manager Rede Edukasaun Timor-Leste Coalition for Education (TLCE), Matias do Santos katak, programa merenda eskolar paradu iha eskolas dalabarak ona akontese, tanba governu laiha planu ne’ebe diak.
“Ministeriu da edukasaun promete tiha ona atu kria fali menu foun ba estudantes sira maibe tanba sa mak buat ne’e la implementa nafatin, ne’e frakeza ida,” Program Manager TLCE ne’e kestiona.
Rede Edukasaun TLCE sujere,ba programa merenda eskolar Ministeriu Edukasaun tenke utiliza produtu lokal ne’ebe komunidade sira produs.
“Ita lalika tan importa tan koto ne’e ladiak, orsida labarik sira sai kabun moras fali,” Program Manager ne’e sujere.
Enkuantu tuir observasaun TLCE nian ba eskola Ensino Baziku Tasi-tolu deskobre katak estudantes sira iha eskola ne’e lor-loron han supermi deit.
Entretantu bainhira TDW tenta konfirma asuntu ne’e ba iha Diretor Seguransa Alimetar ME ninian maibe lakonsege tanba Diretor Carlito Mota laiha fatin.