ME Sei Verifika Profesor Voluntariu Sira

Oras ne’e dadaun Ministeriu Edukasaun hala’o hela verifikasaun ba profesores voluntariu sira iha eskola ida-idak antes sai profesores permanente.

“La kleur tan sira konklui ona verifikasaun ne’e, depois hala’o prosesu ne’e ba oin,” dehan Prezidente KFP, Liborio Perreira, foin lalais, iha Salaun Delta Nova, Dili.

Profesor voluntariu sira ne’e atu sai profesor kontratadu, nia dehan, kriterius mai husi Ministeriu Edukasaun (ME), la’os KFP.

Nia hatutan, Komisaun Funsaun Publika ajuda deit para halo verifikasaun,e liu husi kriteriu ne’e mak sei defini profesor sira ne’ebe mak priense avansa dadauk ba oin ona para priense nesesidade edukasaun nian.

Nia afirma, total profesores voluntariu ne’ebe konsege verifika iha Timor laran tomak hamutuk nain 3.800.

Entretantu Deputadu Paulino Monteiro hateten, iha fiskalizasaun ne’ebe komisaun hala’o iha 13 distritus deskobre katak eskola barak mak menus profesores no profesores voluntariu mak barak liu.

“Tuir ami nia fiskalizasaun parte infra-estrutura iha Eskola Ensino Baziku ida iha Oe-Cusse, professor permanente nain ida deit, enkuantu profesor voluntariu to’o 30 pessoas,” tenik Deputadu Monteiro.

Nia dehan, ida ne’e foin deskobre iha eskola ida, seidauk konta ho eskola sira seluk iha 12 distritus, profesores voluntariu bele rihun ba rihun.

Tanba ne’e nia sujere, molok atu halo kontratu ho sira, presiza halo fiskalizasaun ida kompletu hodi hare didiak ema ne’ebe servisu duni, tanba balun naran lista deit maibe la tama hanorin.

Enkuantu Deputadu Jacinto Viegas Vicente alias Roque husu ba Ministeriu Edukasaun atu mantein professor voluntariu ne’ebe durante ne’e hanorin iha eskola sira iha rai laran.

“Labele hasai, kuandu hasai eskola balun tenke mamuk e alunus sira tinan ba tinan aumenta ba bebeik,” Deputadu Roque sujere.