- Publika iha: 13 Julho 2023
Rede Edukasaun Timor-Leste Coalition for Education (TLCE) husu Ministeriu Edukasaun Juventude no Desportu (MEJD) tenke aumenta subsídiu merenda eskolár husi $0.25 ba $0.50 kada estudante.
Koordenadór TLCE, Jose Monteiro dehan, subsídiu ba merenda eskolar tenke hasa'e atu bele halo mudansa ba menu, nune'e bele hadia nutrisaun labarik sira-nian, nune'e mós kontribui ba abilidade estudante sira nian.
Nia dehan, objetivu husi implementasaun merenda eskolár mak hadia nutisaun estudante nian, nune'e bele hasa'e sira-nia koñesimentu kona-ba siénsia, ikus liu mak bele halo estudante sira badinas eskola.
"Ita husu atu MEJD tenke aumenta subsídiu ba merenda escolar, nune'e bele halo mudansa ba menu, kada loron, tenke iha hahan ne’ebé nutisaun di’ak hanesan, ikan, mantolun, naan, susu-been no modo tahan, la’ós loro-loron mak etu ho koto hela de’it," TLCE Monteiro dehan.
Nia dehan, tanba ne’e mak atu halo mudansa ba menu merenda eskolár tenke mos aumenta subsídiu ba estudante sira kada loron.
"Osan subsídiu ne'e ita la fó direita ba estudante maibé utiliza ba programa merenda eskolár kada loron iha eskola, maibé ita husu atu prepara hahan ne’ebé nutritivu," nia husu.
Iha parte seluk Ministra MEJD, Dulce Soares dehan, politika hasa'e subsídiu merenda eskolár ne'e polítika ne’ebé nia halo iha setimu governu maibé la konsegue realiza.
"Iha governu ida-ne'e ita sei haree fila fali programa hirak ne’ebé mak ita la konsegue realiza, inkliu politika hasa'e subsídiu merenda eskolár. Ita sei realiza hotu tiha mak kontinua ba programa foun," nia dehan.
Tanba ne'e nia dehan, MEJD nafatin esforsu hodi bele realiza programa hirak ne’ebé kontribui ba abilidade estudante nian, nune'e mós halo dezenvolvimentu iha setór edukasaun nian.