- Publika iha: 06 Julho 2023
Primeiru-Ministru (PM), Jose Alexandre Kay Rala Xanana Gusmão, orienta Ministériu Edukasaun Juventude no Desportu (MEJD) tenke kompleta eskola Centro de Formação Aprendisagem Escolar (CAFE) iha territóriu laran.
Nia dehan, eskola CAFE tenke kria iha munisípiu to’o postu admistrativu sira iha territóriu laran, hodi bele fasilita komunidade hotu nian oan asesu ba eskola ne’ebé ho kualidade.
“Eskola Centro de Formação Aprendisagem Escolar (CAFE) ne’e kontribui tebes ba dezenvolvimentu kualidade edukasaun tanba, iha CAFE ne’e maioria hanorin husi professór portugues sira, aleinde estudante sira aprende siénsia, sira mós aprende lian portugues,” PM Xanana dehan.
Tanba ne’e mak orienta ona MEDJ atu bele kompleta eskola CAFE ne’e iha territóriu laran nune’e fasilita estudante sira aprende ho diak.
“Ita hakarak estudante hotu asesu ba edukasaun ne’ebé kualidade di’ak liutan, hahú husi área rurais to’o nasional ida ne’ebé ita-nia hakarak hodi dezenvolve iha setor edukasaun,” nia salienta.
Entretantu, Ministra MEJD, Dulce Soares, dehan kona-ba kriasaun eskola CAFE ne’e mós hola parte iha programa prioridade ministério nian durante nia mandatu.
“Atu kompleta CAFE iha territóriu laran ita presiza konfirma ho ministru sesante atu bele hatene loloos kona-ba CAFE ne’e kria ona iha munisípiu, postu admistrativu hira, no hira mak seidauk, atu nune’e ita bele kontinua kompleta,” nia salienta.
Tanba ne’e nia dehan, MEJD sei investe iha eskola CAFE liuhusi kriasaun infraestrutura, material eskolár, nune’e mós tenke kontratu ho profesór portugues sira hodi bele mai apoiu hanorin.
“Eskola CAFE ne’e ita-nian profesór sira ne’ebé mak hanorin kompostu husi profesór portugues sira, nune’e mós profesór Timoroan sira, mak kompleta malu hodi transmite siénsia ba estudante sira,” MEJD Soares dehan.
Enkuantu nia dehan, totál eskola CAFE ne’ebé mak dadaun ne’e funsiona iha territóriu laran hamutuk 73.