- Publika iha: 20 Março 2022
Programa Nasional Dezenvolvento Suku (PNDS) aloka ona orsamento ho montante $71 milhoens ba konstrusaun Uma Kbit Laek (UKL) iha tinan 2022.
"Husi orsamento $71 milhoens ne'e ita utiliza hodi konstrui uma ba ema kbit laek ne'ebe ekipa PNDS identifika ona hamutuk 4,000 iha teritorio laran," Diretora Programa PNDS, Claudia Soares Pinto, hateten iha knar fatin Vila-Verde Dili.
Nia dehan, uma 4,000 refer ne’e sei konstrui ho tipo rua, medida quartu 2 ho montante $14,000, no ho medida quarto 3 montante $17,000.
"Orsamento $71 milhoens ne'e halo ona transferensia ba konta bankaria ba kada suku 452 nian iha Timor laran, " nia dehan.
Nia dehan, ba implementasaun projeto ne'e implementa fazeadamente laos implementa dala ida tanba UKL ne'ebe implementa nian konstrusaun iha munisipio balun seidauk finaliza.
"Iha tinan kotuk ne'e ita konstrui uma kbit laek hamutuk 1.254 iha teritorio laran ho orsamento $25 milhoens," Diretora PNDS Pinto informa.
Enkaunto nia dehan, husi konstrusaun UKL 1.254 ne'e 70% finaliza ona falta 30% mak konstrusaun seidauk finaliza tanba problema inundasaun lalais akontese no estrada balun hetan estragos no difikulta transporta material konstrusaun sira.
"Iha aldeia ida ita konstrui uma tolu maibe iha tinan 2022 nian kada aldeia konstrui uma 5 tuir osan ne'ebe mak tau ona ba konstrusaun projeto ne'e," nia hateten.
Entretanto, Deputado Parlamento Nacional Antoninho da Conceição hateten, programa governo nian Uma Kbit Laek ne'ebe mak implementa husi Programa Nasional Dezenvolvento Suku rezultado ne'ebe mak iha pozitivo tebes tanba, tamna konstrui uma ba ema kbit laek sira.
"Ita hare rezultado konstrusaun uma kbit laek ne'e ajuda tebes komunidade sira ne'ebe mak la iha forsa hodi konstrui uma ne'ebe mak seguru atu sira bele horik ba ho familia," nia dehan.
Tanba ne'e nia dehan, atu halo dezenvolvimento presija hahu husi baze hanesan programa PNDS nian ne'ebe mak oras ne'e dadaun komesa dezenvolve husi aldeia, suku to nasional, tanba ne'e governo tenke kuntinua tau osan hodi fo prioridade ba dezenvolvimento ne'ebe hahu husi area rural.