- Publika iha: 21 Junho 2013
Komunidade Aldea Poena,Suku Humboe, Distritu Ermera sente konetente tanba oras ne’e dadaun sir abele hetan asesu ona ba iha sintina modernu.
Xefe Suku Humboe, Pedro Salsinha hateten, antes ne’e komunidade sira iha suku ne’e uja deit sintina tradisional (so’e foer arbiru deit) maibe agora sira asesu ona sintina modern.
“Antes ne’e ami halo konsiensializa ba komunidade sira atu kompriende soe foer iha nia fatin, labele soe foer arbiru,” tenik Xefe Suku Humboe, Pedro Salsinha, foin lalais, iha Humboe, Ermera.
Xefe Suku ne’e orgulhu tanba komunidade sir abele transforma sira nia hahalok at ba diak nian, liu-liu kona ba sintina arbiru e agora sira hotu-hotu asesu ba iha sintina modern ne’ebe prepara ona iha uma kain ida-idak.
Alem de ne’e reprezentante feto Suku Humboe,Paulina do Rosario Lemos katak, antes ne’e nia parte hamutuk ho Xefe Aldeia Poena ba tuir treinementu kona ba hatoman komunidade sira sintina iha sintina fatin ne’ebe organiza husi Unicef no Minsteriu Saudeno Saneamentu Distritu Ermera iha Gleno.
“Tanba komunidade barak iha suku ida ne’e iha momentu ne’eba ami kuandu seidauk hetan informasaun kona ba ida ne’e, komunidade pursentu 25 deit mak asesu ba sintina modern, restu sintina arbiru,” tenik Lemos.
Hafoin treinamentu ne’e, nia dehan, sira hamutuk ho lideransa lokal sira hahu kedas sosializasaun ba iha komunidade sira atu halo sintina iha ida-idak nia uma ,to’o ikus komunidade sira mos iha konsiensia rasik hodi harii sintina iha sira nia uma.
“Ami nia suku ami dehan katak, 90% komunidade sira hatene ona uja sintina maibe la’os sintina ida ne’ebe uja azulesu maibe ke’e rai kuak bo’ot hodi soe foer bo’ot atu nune’e labele kria moras ba komunidade sira ,” Lemos informa.