Sexta, Março 01, 2024
Total visitors: 766366

Xefe Gabinete Diresaun Jerál Hospitalar, iha Ministeriu Saúde, Paulina Pinto hateten kampaña Integradu Promosaun Edukasaun Saúde atu hasae koñesimentu no konsiénsia komunidade nian kona-ba nutrisaun, saúde inan no oan, moras denge, Tuberkuloze, moras la hadaet & Asidente Tráfiku, inklui Vasinasaun Covid-19.

Xefe Gabinete Diresaun Jerál Hospitalar, iha Ministeriu Saúde, Paulina Pinto hateten kampaña Integradu Promosaun Edukasaun Saúde atu hasae koñesimentu no konsiénsia komunidade nian kona-ba nutrisaun, saúde inan no oan, moras denge, Tuberkuloze, moras la hadaet & Asidente Tráfiku, inklui Vasinasaun Covid-19.

Nia dehan governu da-sia eleva ona unidade promosaun saúde ba diresaun nasional edukasaun no promosaun saúde, ne’ebé toma responsabilidade reforsa atividade edukasaun no promosaun saúde ba komunidade iha baze.

"Ita-nia vizaun no objetivu hakarak informasaun ba to'o baze atu ema hotu komprende oinsa mak halo prevensaun no hakbesik aan ba fasilidade Saúde, tanba ita haree taxa mortalidade ne'e sei aas, asidente ne’ebé a'as, moras hadaet no la hadaet ne’ebé mosu a'as, entaun hatudu ba ita katak informasaun seidauk másimu to'o iha ita-nia populasaun, tanba ne'e Ministériu Saúde iha polítika no Estratejia kria programa Integradu saúde," nia hateten bainhira partisipa abertura kampaña Integradu edukasaun no promosaun saúde iha suku Loi-Lobu postu administrativu Vemasse Munisípiu Baucau, iha sede suku Loi-Lobu, Baucau.

Nia hateten atividade sensibilizasaun hahú husi autoridade munisípiu sira hanesan administradór sira, konsellu suku sira no voluntáriu saúde sira atu sira bele hatutan informasaun ba komunidade liuhusi atividade vizita domisiliáriu, outreach, Klinika movel, ne’ebé hala’o iha komunidade nia leet.

Nia hatutan atividade kampaña ne'e sei halao durante fulan tolu nia laran atu empodera individu, família no komunidade kona-ba prevensaun no tratamentu ba moras sira inklui asidente tráfiku.

Entretantu, Reprezentante Administrator Vemasse, Liborio do Santos enkoraja lideransa komunitária sira atu partisipa ativu iha atividade hodi mobiliza komunidade hola parte iha atividade hotu.

"Taxa partisipasaun komunidade nian iha atividade sira-ne'e menus tebes kompara ho momentu atu hetan benefisia husi estadu, tanba ne'e enkoraja xefe suku sira atu alerta nafatin ba komunidade," nia hateten.

Nia fiar komunidade iha ona koñesimentu no komprende diak kona-ba moras sira no prevensaun sira automatikamente sei kontribui ba redusaun taxa morbilidade no mortalidade populasaun nian tanba moras.

Iha parte seluk, Xefe Suku Loi-Lobu, Joanico da Costa Freitas hateten prontu kolabora ho pesoal saúde sira fahe informasaun ba komunidade sira kona-ba moras sira ne’ebé a'as iha rai-laran, nune'e sira bele hatene, komprende hodi halo prevensaun, deteta sedu no tratamentu própriu.

"Ita hakarak kombate moras hotu-hotu ne’ebé afeta ita mak ita tenke sensibiliza no fahe informasaun ba komunidade hotu atu ita ida-ida bele prevene aan husi moras sira-ne'e," nia hateten.