- Publika iha: 28 Maio 2013
Atu redus kustu transferensia pasiente ba rai liur hodi halo tratamentu,Primeira Dama, Isabel Ferreira husu ba Mediku sira tenke onestu iha prosesu halo transferensia ne’e.
“Labele halo ema balun deit mak kontente,” dehan Primeira Dama, Isabel Ferreira, foin lalais, bainhira halo enkontru ho Pesoal Saude sira iha Ospital Nasional Guido Valadares (HNGV), Dili.
Tanba tuir nia, Pesoal Saúde sira liu –liu Mediku sira durantene’e tau interese pesoal as liu duke komun no laiha onestidade atu koalia buat ne’ebe los .
Primeira Dama hatutan, durante ne’e sira fasilita deit pasiente sira ne’e ba halo tratamentu iha liur maske sira hatene katak labele salva ona tanba ho rajaun pasiente ne’e familia husi lideransa sira ka iha relasaun familia.
“Ita labele halo lider sira no familia sira kontente deit, ita tenke hateten lolos, se pasiente ne’e labele salva ona, la presiza ba, ida ne’e mak ita bele hadia ita nia ospital, la’e ema hotu nia hanoin hakarak ba liur hotu deit,” dehan Primeira Dama Fereira.
Nia konta iha kazu ida ne’ebe akontese iha tinan hirak liu ba, pasiente ne’e familia husi lideransa rezistensia ida entau medikus sira fasilita ba halo tratamentu iha Indonezia maske sira hatene labele salva ona e ikus mai loron hira deit iha Indonezia pasiente ne’e mate.
“Ne’e signifika katak gasta osan deit,” preokupa Primeira Dama Ferreira.
Medikus iha obrigasaun atu koalia buat ne’ebe los, tuir medikus sira nia hatene ba familia sira katak persentajen ba halo tratamentu iha liur labele ona, nune’e familia sira mos komprende.
Maske nune’e Primeira Dama kontente tanba Ministru Saúde hasai ona despaisu ida hodi la haruka tan moras sira ba liur arbiru, bainhira labele salva ona.
Iha despaisu ne’e ministru dehan, se mak hakarak ba liur prepara osan rasik e estadu laiha finansiamentu ba ida ne’e.